اسلام آباد: وزیراعظم شہباز شریف کو سعودی وفد کے دورے کے بعد ملک میں اربوں ڈالر کی سرمایہ کاری کی امید ہے۔وزیراعظم شہباز شریف کی زیرصدرت وفاقی کابینہ کا اجلاس ہوا ، اجلاس میں وزیراعظم نے کابینہ کو سعودی وفد کے دورے سے آگاہ کیا۔
شہباز شریف نے کہا کہ پوری محنت سے ملک میں سرمایہ کاری کے منصوبوں کی تکمیل کو یقینی بناناہے، پرانے طریقہ کارپرچلنے کی گنجائش نہیں اور نہ اس کی اجازت دوں گا۔علاوہ ازیں وفاقی کابینہ نے ادارہ برائے ماڈرن سائنسزکا بل منظور کرلیا اور کابینہ نے احتساب عدالتوں کی تنظیم نو اور وفاقی پبلک پرائیویٹ پارٹنرشپ کی 5 سالہ پالیسی کی بھی منظوری دے دی۔ وفاقی کابینہ نے فیڈرل ڈرگ انسپکٹر کی تقرری، وزارت سمندرپارپاکستانیز اور وزارت قطرلیبرکے درمیان ایم او یو کی بھی منظوری دی۔وفاقی کابینہ نے اقتصادی رابطہ کمیٹی(ای سی سی) کے فیصلوں کی بھی توثیق کردی۔
وزیرِ اعظم نے ابتدائی گفتگو میں کابینہ کو عید الفطر کی مبارکباد پیش کی اور رمضان المبارک کی برکتوں کے طفیل پاکستان کیلئے ترقی و خوشحالی کی دعا کی.انہوں نے کہا کہ سعودی ولی عہد شہزادہ محمد بن سلمان کے مشکور ہیں کہ میرے حالیہ دورے کے بعد انکی خصوصی دلچسپی کے تحت سعودی وفد نے پاکستان کا دورہ کیا۔
وزیرِ اعظم نے وفاقی کابینہ اور متعلقہ حکام کی سعودی وفد کے کامیاب دورے کیلئے کاوشوں کی پذیرائی کرتے ہوئے کہا کہ سعودی وفد پاکستانی وزرا اور حکام کی تیاری سے متاثر ہوا اور سعودی وزیرِ خارجہ شہزادہ فیصل بن فرحان آلسعود نے اس کا برملا اظہار کیا، سعودی وفد کے دورے کے نتیجے میں پاکستان میں اربوں ڈالر کی سرمایہ کاری ہوگی۔
