اسلام آباد :وزارت خارجہ کا کہنا ہے کہ افغانستان میں موجود دہشت گردگروپ پاکستان کو نشانہ بنارہے ہیںاور اس حوالے سے افغان حکومت سے تفصیلات بھی شیئر کی گئی ہیں۔ترجمان دفتر خارجہ ممتاز زہرہ بلوچ نے کہا ہے کہ ڈی آئی خان میں دہشت گردی کا واقعہ سنجیدہ واقعہ تھا اور ہم نے افغان حکومت کو پاکستان کے حوالے سے آگاہ کردیا ہے۔ترجمان دفتر خارجہ نے کہا کہ ہم نے افغان حکام کو کہا کہ کالعدم ٹی ٹی پی کے دہشت گرد وں کو پاکستان کے حوالے کیا جائے اور پاکستان کے خلاف کاروائی کرنے والے دہشت گرد گروپ کے خلاف ایکشن لیا جائے ۔ممتاز زہرہ بلوچ نے کہا کہ ہم نے افغان حکومت سے مطالبہ کیا تھا کہ افغانستان کی سرزمین پڑوسی ممالک کے خلاف استعمال نہ کی جائے۔ دہشت گردی سے متعلق مزید گفتگو کرتے ہو ئے انہوں نے کہا کہ بھارت دوسرے ممالک میں دہشت گردی جیسے واقعات میں ملوث ہےاور دوسرے ممالک میں ٹارگٹ کلنگ بھی کراتا ہے جبکہ بھارت نے پاکستان میں بھی ایسی کوششیں کیں جن کے شواہد ہمارے پاس موجود ہیں۔
