پشاور: ڈپٹی کمشنر پشاور نے شہر میں 15روز کے لیے دفعہ 144 نافذ کردی۔انتظامیہ کی جانب سے جاری اعلامیے میں کہا گیا ہے کہ شہر میں پندرہ روز کے لیے دفعہ 144 نافذ کردی گئی ہے، اس دوران ہر قسم کا اسلحہ لے جانے پر پابندی ہوگی۔
اعلامیے کے مطابق اس دوران لائسنس یافتہ ہتھیاروں کی نمائش پر بھی پابندی ہوگی۔
صوبائی دارالحکومت کی انتظامیہ نے دفعہ 144 کی خلاف ورزی کی صورت میں سخت کارروائی کا عندیہ دیا ہے۔
واضح رہے کہ 3 روز قبل انتظامیہ نے عام انتخابات 2024 میں امن و امان برقرار رکھنے کے لیے وفاقی دارالحکومت اسلام آباد میں دفعہ 144 نافذ کر دی تھی۔
یاد رہے کہ گزشتہ ہفتے عام انتخابات کے دوران سیکیورٹی خدشات کے پیش نظر ملک کے سب سے بڑے صوبے پنجاب بھر میں دفعہ 144 نافذ کر دی گئی تھی۔
