لاہور: عدالت نے الیکشن کے دوران عمران خان سمیت تمام امیدواروں کو یکساں میڈیا کوریج دینے کا حکم جاری کردیا۔
ہائی کورٹ نے اپنے تحریری فیصلے میں کہا ہے کہ آئین کا آرٹیکل 17 ہر شہری کو آزادی اظہار سمیت دیگر حقوق فراہم کرنے کا پابند بناتا ہے۔ عام انتخابات کے لیے انتخابی مہم اور منشور کی تشہیر بنیادی حق ہے۔
منصفانہ اور شفاف انتخابات کے لیے آزاد میڈیا کے ذریعے اظہار رائے کی آزادی ہونی چاہیے۔ آزادی اظہار کے بغیر انتخابات کو منصفانہ اور شفاف نہیں کہا جا سکتا۔
عدالت نے عام انتخابات میں بانی چیئرمین پی ٹی آئی عمران خان سمیت تمام امیدواروں کو یکساں میڈیا کوریج دینے کا حکم جاری کردیا۔
عدالت نے اپنے تحریری فیصلے میں نواز شریف اور بینظیر بھٹو کیسز کے فیصلوں کا بھی حوالہ دیا۔
واضح رہے کہ بانی چیئرمین پی ٹی آئی نے ٹی وی چینلز پر کوریج نہ ملنے کے اقدام کو ہائیکورٹ میں چیلنج کیا تھا۔
