راولپنڈی: تحریک انصاف کے بانی عمران خان نے جعلی بیلٹ پیپرز کی چھپائی کی ویڈیو پر ردعمل کا اظہار کیا۔
پی ٹی آئی کے مرکزی میڈیا ڈیپارٹمنٹ کی جانب سے جاری بیان کے مطابق بانی پی ٹی آئی نے جعلی بیلٹ پیپرز کی چھپائی کی ویڈیو کے حوالے سے کہا کہ انتخابات کے 10 دن بعد بھی دھاندلی کا انتہائی منظم اور مربوط سلسلہ جاری ہے۔ صحافیوں کی جانب سے بیان کردہ تفصیلات پر مشتمل ویڈیو میں دھاندلی کا واضح طور پر پتہ چلتا ہے۔
عمران خان کا مزید کہنا تھا کہ جن حلقوں سے نواز شریف اور ان کا خاندان ہارا، ان حلقوں کے ریکارڈ سے چھیڑ چھاڑ کے لیے غیر قانونی اقدامات کیے جا رہے ہیں۔
لاہور میں مسلم لیگ ن کے رہنما احسان کے پرنٹنگ پریس میں ان حلقوں کے جعلی بیلٹ پیپرز کی چھپائی کا عمل جاری ہے۔ ہم پرزور مطالبہ کرتے ہیں کہ فارم 45 کے مطابق انتخابی نتائج فوری جاری کیے جائیں۔
