مسلم لیگ ن نے آزاد امیدوار کی حمایت کرنے پر سینئر رہنما سردار مہتاب کو پارٹی سے نکال دیا

لاہور: پاکستان مسلم لیگ (ن) نے ایبٹ آباد میں پی ٹی آئی کے نامزد کردہ آزاد امیدوار برائے قومی اسمبلی کی حمایت کرنے پر سینئر رہنما سردار مہتاب عباسی کو پارٹی سے نکال دیا۔
مسلم لیگ(ن) کی قیادت نے پارٹی ڈسپلن کی خلاف ورزی پر سردار مہتاب عباسی کو تنظیم کی بنیادی رکنیت سے نکال دیا اور انہیں پارٹی سے نکالنے کا نوٹیفکیشن بھی جاری کر دیا۔مسلم لیگ ن کے قائد نواز شریف اور پارٹی صدر شہباز شریف کے فیصلے کے بعد جنرل سیکرٹری احسن اقبال نے سردار مہتاب عباسی کو پارٹی سے نکالنے کا نوٹیفکیشن جاری کر دیا۔
واضح رہے کہ ایک روز قبل سرداری مہتاب عباسی نے ایبٹ آباد کے حلقہ این اے 17 میں پاکستان تحریک انصاف کے حمایت یافتہ اپنے 35 سالہ حریف اور آزاد امیدوار علی خان جدون کی حمایت کا اعلان کیا تھا۔
مسلم لیگ ن کی جانب سے ٹکٹ نہ ملنے پر سردار مہتاب احمد خان نے مسلم لیگ ن چھوڑنے اور این اے 16 ایبٹ آباد 1 سے آزاد حیثیت سے الیکشن لڑنے کا اعلان کیا تھا جب کہ وہ صوبائی حلقوں سے بھی مسلم لیگ ن کا حصہ تھے۔ امیدواروں کے مقابلے میں آزاد امیدوار بھی کھڑے ہیں۔