کراچی: گورنر سندھ کامران ٹیسوری نے کہا کہ جماعت اسلامی کے دھرنا کو خوش آمدید کہتا ہوں۔
گورنر سندھ کامران خان ٹیسوری نے جماعت اسلامی کی قیادت کو ایک بار پھر پیشکش کرتے ہوئے کہا کہ گورنر ہاؤس کے دروازے عوام کے لئے کھل چکے ہیں آپ بھی اندر آجائیں، آئی ٹی کورسز میں داخلہ لینے کے لئے دھرنے میں شریک نوجوان اپنی تعلیمی اسناد ضرور ساتھ لائیں۔
کامران ٹیسوری نے کہا کہ سب کو آئی ٹی کورسز کرانے کو تیار ہوں تاکہ یہ نوجوان ہنر مند بن سکیں، راشن کے لئے کسی تعلیمی اسناد کی ضرورت نہیں، صرف شناختی کارڈ پر مل جائے گا، برسات کا موسم ہے، آجائیں، آپ کو پکوڑے بھی کھلائیں گے۔
گورنر سندھ نے مزید کہا کہ ابھی آئی ٹی کلاسز ہو رہی ہیں، قیادت رات آئی ٹی مارکی میں بسر کرسکتی ہے، آئی ٹی مارکی میں اے سی بھی لگے ہیں، آپ کو گرمی کا احساس بالکل بھی نہیں ہوگا، انہوں نے کہا کہ مہنگائی کے ساتھ ساتھ بجلی اور پانی کی عدم دستیابی پر بھی آواز بلند کریں۔ان کا مزید کہنا تھا کہ مجھے بتائیں کہاں پر دھرنا دینا ہے ان ایشوز پر آپ کے ساتھ ہوں۔
دریں اثناء گورنرسندھ کامران خان ٹیسوری نے کہا ہے کہ گورنرہاؤس سے 24 گھنٹے مستحقین میں راشن کی تقسیم کا عمل شروع کرنے جارہے ہیں انشااللہ 20 لاکھ سے زائد مستحقین میں راشن بیگز تقسیم کئے جائیں گے۔
انہوں نے کہا کہ پہلے مرحلے میں 9ہزار سولر سسٹم کا آڈر دے دیا ہے ، سولر سسٹم 300 یونٹس سے کم استعمال کرنے والوں کو دیئے جائیں گے۔ان خیالات کا اظہار انہوں نے گورنرہاؤس میں مستحقین میں راشن بیگز کی تقسیم کے بعد میڈیا سے بات چیت کرتے ہوئے کیا ۔
گورنرسندھ نے کہا کہ اب تک 6 لاکھ 90 سے زائد مستحق افراد میں راشن بیگز تقسیم کئے جاچکے ہیں آج تک تقریبا 30 لاکھ سے زائد افراد گورنر ہاؤس آچکے ہیں ، نوجوانوں کو 8ہزار لیپ ٹاپ دے گئے ہیں ، 50ہزار نوجوانوں کو آئی ٹی کے مفت کورسز کرائے جارہے ہیں۔
