اسلام آباد: بانی پی ٹی آئی عمران خان نے کہا ہے کہ انہیں ڈونلڈ لو اور جنرل باجوہ کو ایکسپوز کرنے کی سزا دی جا رہی ہے’ سب کچھ لندن پلان کے تحت ہو رہا ہے’ بلاول کے ساتھ انتخابی اتحاد نہیں ہوسکتا۔
بانی پاکستان تحریک انصاف نے میڈیا سے غیررسمی بات چیت کرتے ہوئے کہا کہ چیف جسٹس سے کہناچاہتا ہوں کہ قرآن کے پانچویں پارے کی 8ویں آیت پڑھ لیں’ قرآن میں ہے کہ دشمنوں سے بھی اتنی نفرت نہ کرو کہ انصاف نہ کرسکو۔ انہوں نے کہا کہ بلے کے کیس کی سماعت کے لئے 5 رکنی بینچ ہونا چاہیے تھا۔
عمران خان کا کہنا تھا کہ سب کچھ لندن پلان کے تحت ہو رہا ہے’ عمران خان کا جیل میں ہونا’ پی ٹی آئی کا خاتمہ اور نواز شریف کے کیس معاف ہونا اس پلان کا حصہ ہے’ سب کچھ یہ بتانے کے لئے ہو رہا ہے کہ وہ قانون سے بالا تر ہیں۔
بانی پی ٹی آئی نے الزام عائد کیا کہ انہیں ڈونلڈ لو اور جنرل باجوہ کو ایکسپوز کرنے کی سزا دی جا رہی ہے’ جبکہ سپریم کورٹ بھی لندن ایگریمنٹ کے تحت چل رہی ہے۔
عمران خان نے پیپلز پارٹی کے ساتھ انتخابی اتحاد کے خیال کو رد کرتے ہوئے کہا کہ بلاول کے ساتھ انتخابی اتحاد نہیں ہوسکتا۔
انہوں نے کہا کہ نواز شریف نے جانبدار امپائرز کے بغیر کبھی میچ نہیں کھیلا’ ابھی بھی دو امپائر کھڑے کئے ہوئے ہیں جن میں ایک امپائر نے نول دے دی ہے۔
بانی پی ٹی آئی نے کہا کہ توشہ خانہ ریکارڈ پر ہے کہ نواز شریف نے6 لاکھ میں مرسیڈیز گاڑی اور مریم نواز نے بی ایم ڈبلیو گاڑی لی’ ان کے سارے کیس بند ہیں’ ہمارا ایک کیس ختم ہوتا ہے تو دوسرا شروع ہو جاتا ہے۔
انہوں نے کہا کہ واحد آدمی ہوں جس نے27 سال جدوجہد کرکے پارٹی کو اس جگہ پہنچایا’ ان کو عوام کے غصے کا انداز نہیںہے۔ سوشل میڈیا کے دور میں کوئی چیز چھپ نہیں سکتی’ انہیں لوگوں کا غصہ8 فروری کو نظر آئے گا اور لوٹوں کی حالت بھی8 فروری کو نظر آئے گی۔
عمران خان نے کہا کہ آج پیش گوئی کر رہا ہوں کہ ان کو دھچکا لگنے والا ہے’ پی ٹی آئی کے امیدواروں کو انتخابی مہم چلانے نہیں دی جا رہی ‘ پر عوام میرے ساتھ کھڑے ہیں۔
