اسلام آباد: وفاقی حکومت نے پی ٹی آئی کے بانی کا جیل میں سائفر ٹرائل کالعدم قرار دینے کے فیصلے کو سپریم کورٹ میں چیلنج کردیا۔
وفاقی حکومت کی جانب سے درخواست ایڈووکیٹ راجہ رضوان عباسی نے دائر کی، درخواست میں بانی پی ٹی آئی، جج ابوالحسنات، ڈی جی ایف آئی اے، آئی جی، ڈی سی اور چیف کمشنر اسلام آباد سمیت دیگر کو فریق بنایا گیا ہے۔
وفاقی حکومت کی جانب سے سپریم کورٹ میں دائر درخواست میں موقف اختیار کیا گیا ہے کہ اسلام آباد ہائی کورٹ نے حقائق کا درست جائزہ نہیں لیا اور سائفر ٹرائل کے لیے قائم خصوصی عدالت کو کالعدم قرار دے دیا۔
ہائی کورٹ کو خصوصی عدالت کی حیثیت ختم کرنے کا اختیار نہیں ہے۔درخواست میں سپریم کورٹ سے استدعا کی گئی کہ اسلام آباد ہائی کورٹ کے 21نومبر 2023 کے فیصلے کو کالعدم قرار دیا جائے۔
