غیروابستہ تحریک کے 19ویں سربراہی اجلاس میں پاکستان نے موقف اختیار کیا کہ عالمی چیلنجوں پر موثر بین الاقوامی تعاون کے ذریعے ہی قابو پایا جا سکتا ہے۔
دفتر خارجہ کے ترجمان کے مطابق ایڈیشنل سیکرٹری خارجہ سید حیدر شاہ نے یوگنڈا کے شہر کمپالا میں غیروابستہ تحریک کے 19ویں سربراہی اجلاس میں پاکستان کا موقف پیش کیا۔
دفتر خارجہ کے ترجمان کے مطابق پاکستان نے غیروابستہ تحریک کے ساتھ اپنے پختہ عزم کا اعادہ کیا اورغیروابستہ تحریک کے بانی اصولوں، امن اور تعاون کی حمایت جاری رکھی۔
ایڈیشنل سیکرٹری خارجہ نے ملاقات میں کہا کہ عالمی چیلنجز پر موثر بین الاقوامی تعاون سے ہی قابو پایا جا سکتا ہے، پائیدار سماجی و اقتصادی ترقی کے لیے اصلاحات ضروری ہیں، ترقی پذیر ممالک میں فنانس، تجارت اور ٹیکنالوجی میں اصلاحات ضروری ہیں۔
انہوں نے کہا کہ مسئلہ کشمیر کو سلامتی کونسل کی قراردادوں کے مطابق حل کیا جائے، مسئلہ کشمیر کو کشمیریوں کی امنگوں کے مطابق جلد از جلد حل کیا جائے۔
