پاکستان پیپلز پارٹی (پی پی پی) کے چیئرمین بلاول بھٹو زرداری کا کہنا ہے کہ وہ نفرت اور تقسیم کو دفن کرنے کے لیے الیکشن لڑ رہے ہیں جب کہ پیپلز پارٹی واحد جماعت ہے جو ملک کو درپیش مسائل کا مقابلہ کرسکتی ہے۔
ساہیوال میں جلسے سے خطاب کرتے ہوئے بلاول بھٹو زرداری نے کہا کہ پاکستان مشکل وقت اور تاریخی معاشی بحران سے گزر رہا ہے، پیپلز پارٹی واحد جماعت ہے جو مسائل کا مقابلہ کر سکتی ہے۔
انہوں نے کہا کہ مہنگائی، غربت اور بے روزگاری بڑھ رہی ہے، معاشرے میں تقسیم پھیل رہی ہے، بھائی کو بھائی سے لڑایا جا رہا ہے، نفرت اور تقسیم کو دفن کرنے کے لیے الیکشن لڑ رہا ہوں۔
انہوں نے کہا کہ میں اپنے منشور کے ساتھ پورے ملک کا دورہ کر رہا ہوں، گالی گلوچ اور نفرت کی سیاست ہمارے منشور میں نہیں۔
بلاول بھٹو زرداری نے کہا کہ ہمیں موقع ملا تو خواتین کو بلاسود قرضہ دیں گے، کسان کارڈ لائیں گے، پیپلز پارٹی کی حکومت میں کسانوں کو فصل کی قیمت ملے گی، نقصان ہوا تو فصل میں چھوٹے کسانوں کو رقم دی جائے گی۔ بے نظیر لیبر کارڈ کے ذریعے تمام سہولیات فراہم کریں گے، جب کہ بے روزگار نوجوانوں کے لیے یوتھ کارڈ آرہا ہے۔
