اسلام آباد: شوکت عزیز صدیقی کیس میں سابق ڈی جی آئی ایس آئی فیض حمید نے سپریم کورٹ میں جواب جمع کرا دیا۔ جواب میں انہوں نے شوکت عزیز صدیقی کے تمام الزامات کو بے بنیاد من گھڑت قرار دیا ہے۔
جنرل (ر) فیض حمید کی جانب سے جمع کرائے گئے جواب میں عدلیہ پر اثر انداز ہونے کے الزام کو مسترد کرتے ہوئے کہا ہے کہ انہوں نے کبھی شوکت عزیز صدیقی سے رابطہ نہیں کیا، ان سے ملاقات نہیں کی اور نہ ہی نواز شریف کی اپیلوں پر بات کی۔
سابق ڈی جی آئی ایس آئی نے کہا کہ شوکت عزیز صدیقی نے اپنی تقریر میں اور جوڈیشل کونسل کے سامنے کسی مبینہ ملاقات کا ذکر نہیں کیا۔
بقول فیض حمید (انہوں نے) کبھی نہیں کہا کہ ہماری دو سال کی محنت رائیگاں جائے گی، شوکت عزیز صدیقی کے تمام الزامات بے بنیاد اور من گھڑت ہیں، اور بعد میں آنے والے خیالات کے مترادف ہے۔
ادھر سابق چیف جسٹس اسلام آباد ہائی کورٹ انور کانسی نے بھی سپریم کورٹ میں جواب جمع کرا دیا۔ اپنے جواب میں جسٹس (ر) انور کانسی نے شوکت عزیز صدیقی کے الزامات کو بھی مسترد کر دیا ہے۔
اس کے علاوہ بریگیڈیئر (ر) عرفان رامے کا جواب بھی سپریم کورٹ میں جمع کرایا گیا ہے جس میں انہوں نے شوکت عزیز صدیقی اور ان سے ملاقات کے الزامات کی تردید کی ہے۔
