ماسکو: روس کا طیارہ 65 یوکرائنی جنگی قیدیوں کو لے کر گر کر تباہ ہوگیا، طیارے میں سوار تمام افراد ہلاک ہوگئے۔عالمی خبر رساں ادارے کے مطابق روس کا ایک فوجی ٹرانسپورٹ طیارہ یوکرین سے واپسی پر بیلگوروڈ میں گر کر تباہ ہو گیا اور اس میں آگ لگ گئی۔ کسی بھی قسم کی مدد ملنے سے پہلے ہی طیارہ مکمل طور پر جل کر راکھ ہو گیا۔
اس طیارے میں یوکرین کے 65 جنگی قیدیوں کو روسی قیدیوں کے ساتھ تبادلے کے لیے لایا جا رہا تھا جب کہ طیارے میں عملے کے 5 ارکان اور 3 روسی فوجی بھی موجود تھے۔ حادثے میں تمام افراد ہلاک ہو گئے۔
حادثے کی ایک ویڈیو میں طیارہ تیزی سے عمودی طور پر اترتا اور رہائشی علاقے میں زمین پر گرتا ہوا دیکھا جا سکتا ہے۔
دریں اثنا روسی پارلیمنٹ کے سپیکر ویاچسلاو ولوڈن نے یوکرین پر جنگی قیدیوں کو لے جانے والے مسافر طیارے کو مار گرانے کا الزام لگایا۔ یوکرین نے اپنے ہی فوجیوں کو ہوا میں گولی مار دی۔
دوسری جانب اے ایف پی نے یوکرائن کے مقامی میڈیا کے حوالے سے کہا ہے کہ اس کی دفاعی فورسز نے روسی طیارے کو مار گرایا کیونکہ طیارہ S-300 زمینی فضائی دفاعی نظام کے لیے میزائل لے جا رہا تھا۔
یاد رہے کہ روسی IL-76 طیارہ فوجیوں، کارگو اور فوجی سازوسامان جیسے ٹینک، ہووٹزر اور گولہ بارود کی نقل و حمل کے لیے ڈیزائن کیا گیا تھا۔
