پشاور: اے این پی نے خیبرپختونخوا کے عوام کو بیوقوف کہنے پر سابق وزیراعظم نواز شریف سے معافی مانگنے کا مطالبہ کردیا۔
اے این پی کے ترجمان ثمربلور نے کہا کہ مسلم لیگ ن کے رہنما اور پاکستان کے تین بار وزیر اعظم رہنے والے شخص کو یہ زیب نہیں دیتا کہ ایک صوبے کے عوام کو بیوقوف کہے۔ یہ الفاظ ایسے وقت کہے گئے جب ان کی بیٹی نے اسی صوبے میں انتخابی مہم چلا رہی تھیں’یہ لوگ یہاں آکر ووٹ کیسے مانگیں گے۔
ثمربلور نے کہا کہ ماضی میں اسی جماعت نے ہمیں حقوق دینے سے انکار کیا تھا اور تحریک کے رہنما خان عبدالولی خان نے اتحاد چھوڑنے کا اعلان کیا تھا، شاید آج نواز شریف ایک بار پھر تاریخ دہرا رہے ہیں۔
انہوں نے کہا کہ ہم جانتے ہیں کہ پنجاب کا ڈومیسائل رکھنے والا ہر شخص اس ملک میں معزز سمجھا جاتا ہے لیکن پختونخوا کے عوام کے نمائندے ا بھی موجود ہیں۔
ان کا مزید کہنا تھا کہ ہم نہ صرف اس فعل کی مذمت کرتے ہیں بلکہ نواز شریف سے مطالبہ کرتے ہیں کہ وہ اپنے الفاظ واپس لیں اور پوری قوم سے معافی مانگیں۔
