کوئٹہ: بلوچستان کے شہروں کوئٹہ، جعفرآباد اور تربت میں دھماکوں میں ایک شخص جاں بحق اور تین زخمی ہوگئے۔
کوئٹہ شہر کے علاقے اسپنی روڈ پر زور دار دھماکا ہوا، جس کی آواز دور دور تک سنی گئی، بعد ازاں سیکیورٹی اور امدادی ادارے وہاں پہنچ گئے۔ فوری طور پر ایک شخص کے ہلاک اور چند کے زخمی ہونے کی اطلاعات موصول ہوئی ہیں۔
اسی طرح تربت شہر کے غلام نبی چوک پر دستی بم پھٹنے سے ایک شخص زخمی ہوگیا۔
تیسرا دھماکا ضلع جعفرآباد کے علاقے ڈیرہ اللہ یار میں قومی شاہراہ پر ہوا جہاں کریکر دھماکے میں تین افراد زخمی ہوئے جنہیں اسپتال منتقل کردیا گیا۔
چوتھا دھماکہ کوئٹہ کے قمبرانی روڈ پر ہوا۔ ریسکیو ذرائع کے مطابق دستی بم حملے میں کوئی جانی نقصان نہیں ہوا۔
تینوں واقعات میں سیکیورٹی فورسز نے جائے وقوعہ کو گھیرے میں لے کر تفتیش شروع کردی ہے۔
ادھر الیکشن کمیشن کے ترجمان نے کہا ہے کہ بلوچستان میں آج ہونے والے دھماکوں کا نوٹس لیتے ہوئے الیکشن کمیشن نے چیف سیکرٹری اور آئی جی بلوچستان سے فوری رپورٹ طلب کر لی ہے۔
