راولپنڈی: پی ٹی آئی کے بانی عمران خان اور عوامی مسلم لیگ کے سربراہ شیخ رشید کے خلاف 9 مئی کو ہونے والے مقدمات میں پی ٹی آئی کے سابق اسپیکر پنجاب اسمبلی اور سابق رکن قومی اسمبلی وعدہ معاف گواہ بن گئے ۔
ذرائع کا کہنا ہے کہ سابق سپیکر پنجاب اسمبلی واثق قیوم، سابق رکن قومی اسمبلی صداقت عباسی اور عمر تنویر بٹ وعدہ معاف گواہ بن گئے ہیں ۔
ذرائع کے مطابق صداقت عباسی، واثق قیوم اور عمر تنویر بٹ نے عدالت میں 154 بیانات قلمبند کرائے۔
ذرائع کا کہنا ہے کہ قومی اسمبلی کے حلقہ این اے 53 میں پی ٹی آئی کے حمایت یافتہ امیدوار اجمل صابر بھی شیخ رشید کے خلاف وعدہ معاف گواہ بن گئے ۔
اجمل صابر نے اپنے بیان میں کہا کہ شیخ رشید نے 6 مئی کو لال حویلی میں اجلاس بلایا تھا جہاں 9 مئی کے واقعات کی منصوبہ بندی کی گئی۔
گواہوں نے اپنے بیان میں کہا کہ 9 مئی کے واقعات کی منصوبہ بندی شیخ رشید، راجہ بشارت، راشد شفیق، اعجاز خان، راشد حفیظ اور پی ٹی آئی کے بانی عمران خان کے کہنے پر کی گئی۔
واضح رہے کہ پی ٹی آئی کے حمایت یافتہ امیدوار اجمل صابر اس وقت 9 مئی کے مقدمات میں پولیس کی حراست میں ہیں۔
انسداد دہشت گردی کی عدالت نے پی ٹی آئی کے بانی عمران خان، شیخ رشید اور راشد شفیق کو 6 فروری کو طلب کر لیا ہے۔
