اسلام آباد: اوگرا نے 2 فروری سے سوئی ناردرن کے لیے 35.1 فیصد اور سوئی سدرن کے لیے 8.5 فیصد ٹیرف میں اضافہ کر دیا ہے۔اوگرا نے اضافے کا نوٹیفکیشن منظوری کے لیے وفاقی حکومت کو بھجوا دیا۔
نوٹیفکیشن کے مطابق سوئی ناردرن سسٹم پر گیس کی اوسط قیمت 1238.68 روپے سے بڑھا کر 1673.82 روپے فی ایم ایم بی ٹی یو کر دی گئی ہے۔ سوئی ناردرن کو صارفین سے 180 ارب روپے مزید وصول کرنے کی اجازت دی گئی۔
سوئی سدرن کی گیس کی اوسط قیمت 1350.68 روپے سے بڑھا کر 1466.40 روپے فی ایم ایم بی ٹی یو کر دی گئی ہے۔ سوئی سدرن کو صارفین سے 48 ارب روپے مزید وصول کرنے کی اجازت دی گئی۔ نوٹیفکیشن کے مطابق اوگرا سوئی کمپنیوں سے گیس چوری کی شرح کم کرنے میں ناکام رہا۔
اوگرا کے مطابق سوئی کمپنیوں نے گیس چوری کم کرنے کے لیے اوگرا کو ٹھوس پلان پیش نہیں کیا اور رواں مالی سال سوئی ناردرن کو گیس چوری کی وجہ سے 14 ارب 77 کروڑ روپے کا نقصان ہوگا۔
حکومت نے یکم جولائی سے زیادہ منافع کمانے والی کمپنیوں پر سپر ٹیکس لگانا شروع کر دیا تھا اور حکومت نے ہدایت کی تھی کہ لیوی کو صارفین پر منتقل نہ کیا جائے۔
سوئی ناردرن کو کرک میں دفتر کھولنے کی اجازت بھی دی گئی جس کے لیے سالانہ 10 کروڑ روپے کے اخراجات کی منظوری دی گئی۔
