نگراں وزیراعظم انوار الحق کاکڑ نے کہا ہے کہ نگراں حکومت ملک میں شفاف انتخابات کے کامیاب انعقاد کے لیے ہر ممکن اقدامات کر رہی ہے۔
وزیراعظم آفس کے میڈیا ونگ کے مطابق کامن ویلتھ آبزرور گروپ کے سربراہ ڈاکٹر گڈلک ایبل جوناتھن نے ایک وفد کے ہمراہ نگراں وزیراعظم سے ملاقات کی۔
وزیراعظم نے 2024 کے انتخابات کے حوالے سے وفد کی پاکستان آمد کا خیرمقدم کیا۔ انہوں نے کامن ویلتھ کی سیکرٹری جنرل پیٹریشیا سکاٹ لینڈ کے پاکستان کامن ویلتھ تعلقات کو مضبوط بنانے کے اقدامات کو سراہا۔
انوارالحق کاکڑ نے کہا کہ انتخابات 2024 کی شفافیت کے لیے بین الاقوامی مبصرین کی آمد کا خیر مقدم کرتے ہیں، حکومت بین الاقوامی مبصرین کو انتخابات 2024 کا جائزہ لینے کے لیے تمام سہولیات فراہم کرے گی۔
انہوں نے کہا کہ نگراں حکومت ملک میں شفاف انتخابات کے کامیاب انعقاد کے لیے ہر ممکن اقدامات کو یقینی بنا رہی ہے، نگران حکومت ہر جماعت کو اپنی انتخابی مہم کے لیے موزوں ماحول فراہم کر رہی ہے۔
نگراں وزیراعظم نے کہا کہ نگراں حکومت شفاف انتخابات کے کامیاب انعقاد کے لیے الیکشن کمیشن کو تمام سہولیات فراہم کرنے کو یقینی بنا رہی ہے۔ 2024کے انتخابات میں عوام فیصلہ کریں گے کہ پاکستان کی قیادت کس جماعت کے حوالے کرنی ہے۔
وفد نے دولت مشترکہ کے سیکرٹری جنرل کی جانب سے وزیراعظم کو خیرسگالی کا پیغام بھیجا اور 2024کے انتخابات کے شفاف انعقاد کے لیے الیکشن کمیشن کے انتظامات کو تسلی بخش قرار دیا۔
