سابق وزیراعظم شاہد خاقان عباسی کا کہنا ہے کہ فارم 47 پر کمپرومائز کرنا ہوگا تب ہی حکومت بن سکتی ہے۔
شاہد خاقان عباسی نے کراچی کی احتساب عدالت کے باہر میڈیا سے گفتگو کرتے ہوئے کہا کہ پانچواں سال ہو گیا ہے، کیس چل رہا ہے پتہ نہیں مجھ پر کیا الزام ہے؟الیکشن کے حوالے سے بات کرتے ہوئے شاہد خاقان عباسی نے کہا کہ یہ انوکھا الیکشن تھا، جس پر گوگل کو بھی رزلٹ کی فکر ہے، فارم 45 اور فارم 47 کا مسئلہ ہے، فارم 47 جیت گیا، یہ الیکشن کمیشن کا معجزہ ہے۔
انہوں نے کہا کہ میں نے پہلے ہی کہا تھا کہ حالات بہتر ہوئے تو الیکشن کرائیں، میں درست ثابت ہوا اور سب نے دیکھا کہ کیا ہوا اور کیا ہوگا، آپ اس طرح معاملات ٹھیک نہیں کرسکتے۔ مسئلہ ملک کا ہے اور سب کو ملک کی بات کرنی چاہیے۔
سابق وزیراعظم نے کہا کہ یہ ایک ناکام الیکشن ہے، سب اقتدار کی بات کر رہے ہیں تاکہ مجھے اقتدار ملے، جو جتنا کمپرومائز کرے گا وہی حکومت بنائے گا۔
صحافی نے شاہد خاقان سے سوال کیا کہ کس سے کمپرومائزکریں؟ جس پر انہوں نے جواب دیا کہ فارم 47 سے کمپرومائز کرنا ہوگا۔
