لاہور: ترجمان مسلم لیگ ن مریم اورنگزیب نے کمشنر راولپنڈی کا نام ایگزٹ کنٹرول لسٹ(ای سی ایل) میں ڈالنے کا مطالبہ کردیا۔
پارٹی سیکرٹریٹ میں پریس کانفرنس کرتے ہوئے مسلم لیگ ن کی ترجمان مریم اورنگزیب نے کہا کہ کمشنر نے بیان دیا کہ راولپنڈی میں جہاں پی ٹی آئی ہاری وہاں 50 ہزار ووٹوں میں دھاندلی ہوئی’ پی ٹی آئی کے جیتے گئے حلقوں کے علاوہ راولپنڈی میں دھاندلی ہوئی ہے۔
انہوں نے کہا کہ کمشنر کے پاس ایسا کوئی اختیار نہیں جو اسے انتخابی نتائج کی تیاری تک رسائی دے، کمشنر نہ تو آر او ہوتا ہے اور نہ ہی ڈی آر او ہوتا ہے ۔ موصوف کہہ رہے ہیں راولپنڈی ڈویڑن میں جعلی لیڈ دے کر امیدواروں کو جتوایا گیا’ آپ کوالیکشن کمیشن جانا چاہیے تھا جہاں 3 دن تک نتائج رکے رہے۔
مریم اورنگزیب نے کہا کہ کمشنر راولپنڈی کہتے ہیں فارم 45 میں کوئی غلطی نہیں، کمشنر ثبوت دیں، ثبوت میڈیا کے سامنے بھی پیش کریں، 8 دن بعد خود کو پولیس کے حوالے کرنے کی کیا ضرورت ہے، تفتیش ہونی چاہیے۔ کمشنر 8 دن تک کن لوگوں سے ملتے رہے۔
ترجمان مسلم لیگ ن کا کہنا تھا کہ جب عالمی میڈیا پی ٹی آئی والوں سے فارم 45 کے بارے میں پوچھتا ہے تو جواب ملتا ہے کہ ہمارے پاس اسکرین شاٹ ہے، پھر جعلی فارم 45 تیار کرکے سوشل میڈیا پر اپ لوڈ کیا جاتا ہے۔ جب ان سے حساب مانگا جاتا ہے تو سیاست پر چڑھائی کر دیتے ہیں۔
انہوں نے کہا کہ 4سال میں انہوں نے ملک کو تباہی کے دہانے پر پہنچا دیا، ملک میں انتشار پھیلایا گیا جب تک ملک ڈیفالٹ نہیں ہوا، شہدا کے مجسمے گرائے گئے، ان کو ٹھوکریں ماری گئیں’اسکول جلائے گئے، اسپتال جلائے گئے۔ ملک کو لاک ڈان کرو، یہ ایک پورا گروہ ہے جو پورے ملک میں امن و امان نہیں لانا چاہتا۔
مریم اورنگزیب نے مزید کہا کہ آج ہم سب نے فیصلہ کرنا ہے کہ ہم ملک کے لیے کیا کرنا چاہتے ہیں، کمشنر راولپنڈی کا نام ای سی ایل میں ڈالا جائے تاکہ ملک میں ہیجان پیدا کرنے والے بیرون ملک فرار نہ ہوسکیں۔
