اسلام آباد: سینیٹ کی قائمہ کمیٹی برائے انسانی حقوق کے اجلاس میں انکشاف ہوا ہے کہ 23ہزار 456 پاکستانی شہری بیرون ممالک میں قید ہیں۔
چیئرمین ولید اقبال کی زیر صدارت سینیٹ کی قائمہ کمیٹی برائے انسانی حقوق کے اجلاس میں وزارت خارجہ نے بیرون ملک قید پاکستانیوں کی تفصیلات پیش کیں جس کے مطابق 23456پاکستانی بیرون ملک قید ہیں۔
چیئرمین کمیٹی کے مطابق سعودی عرب میں 12ہزار 156، قطر میں 338، متحدہ عرب امارات میں 5ہزار 292اور عراق میں 519 پاکستانی قید ہیں۔
وزارت خارجہ کے حکام کی کمیٹی کو بریفنگ میں مزید بتایا گیا کہ بحرین میں قید پاکستانیوں کی تعداد 450، برطانیہ میں 330، امریکا میں 44، ترکی میں 308، ملائیشیا میں 255 قید ہیں۔
اسی طرح اٹلی میں 330 پاکستانی، ایران میں 100، کویت میں 59، بھارت میں 706، یونان میں 811، چین میں 400 اور افغانستان میں 88 پاکستانی قید ہیں۔
وزارت خارجہ کے حکام نے بتایا کہ بیرون ملک قید 15 ہزار 587 پاکستانی سزا یافتہ ہیں اور 7 ہزار 869 زیر سماعت ہیں۔
کمیٹی میں قیدیوں کے تبادلے کے معاہدے (قیدیوں کے تبادلے کے معاہدے) سے متعلق معاملہ زیر بحث آیا جس پر وزارت داخلہ کے حکام نے بتایا کہ 11 ممالک کے ساتھ قیدیوں کے تبادلے کا معاہدہ ہے۔
ان ممالک میں آذربائیجان، چین، ایران، جنوبی کوریا، سری لنکا، سعودی عرب، تھائی لینڈ، ترکی، متحدہ عرب امارات اور برطانیہ شامل ہیں۔
بریفنگ کے بعد سینیٹ کی قائمہ کمیٹی نے وزارت خارجہ کو ہدایت کی کہ وہ 90 دنوں میں یکساں کونسلر پروٹیکشن پالیسی بنائے اور قیدیوں کی منتقلی کے معاہدے کی تفصیلات ویب سائٹ پر جاری کرے۔
