اسلام آباد: آئی ایم ایف کی ترجمان ایسٹر پیریز نے عمران خان کے خط کا جواب دیتے ہوئے کہا ہے کہ آئی ایم ایف کا مینڈیٹ سیاسی نہیں معاشی مسائل تک محدود ہے۔
پی ٹی آئی کے بانی چیئرمین عمران خان کی جانب سے خط کی وصولی کی تصدیق کرتے ہوئے انٹرنیشنل مانیٹری فنڈ کی ترجمان ایسٹر پیریز نے کہا کہ آئی ایم ایف کو پی ٹی آئی کے ترجمان کی جانب سے 28 فروری کو ایک خط موصول ہوا جس میں کہا گیا کہ یہ پروگرام فنڈ کی پاکستان کے ساتھ شمولیت سے متعلق تھا۔
آئی ایم ایف کی نمائندہ ایسٹرپیرز نے پی ٹی آئی کے بانی چیئرمین عمران خان کی جانب سے خط موصول ہونے کی تصدیق کرتے ہوئے اس پر اپنے ردعمل کا اظہار کرتے ہوئے کہا کہ آئی ایم ایف ایک بین الاقوامی ادارہ ہے جس کا مینڈیٹ صرف معاشی مسائل تک محدود ہے۔ انہوں نے مزید کہا کہ آئی ایم ایف مقامی اور سیاسی معاملات پر تبصرہ نہیں کرتا۔
بین الاقوامی مالیاتی فنڈ کی نمائندہ ایسٹر پیرز نے بیان میں مزید کہا کہ ہم ادارہ جاتی اقتصادی استحکام اور ترقی کے لیے انتخابی تنازعات کے شفاف اور پرامن حل کی حوصلہ افزائی کرتے ہیں۔
یاد رہے کہ اس بات کی تصدیق خود عمران خان نے کی تھی کہ انہوں نے آئی ایم ایف کو خط لکھا تھا۔ انہوں نے کہا کہ خط اس لیے لکھا ہے کہ اگر ایسی صورتحال میں ملک کو قرضہ ملے تو کون واپس کرے گا؟ اس قرض سے غربت بڑھے گی، جب تک سرمایہ کاری نہیں آئے گی قرض بڑھے گا۔ سب سے پہلے ملک میں سیاسی استحکام لایا جانا چاہئے۔
