غزہ یونیورسٹی پر اسرائیل کی بمباری؛ امریکہ نے وضاحت مانگی

تل ابیب: اسرائیل نے مبینہ طور پر غزہ میں ایک یونیورسٹی کو نشانہ بنایا اور ایک کیمپس بمباری سے مکمل طور پر تباہ ہوگیا۔
بین الاقوامی خبر رساں ادارے کے مطابق سوشل میڈیا پر وائرل ہونے والی ویڈیوز میں بمباری سے تباہ ہونے والی یونیورسٹی کی عمارت کو دیکھا جا سکتا ہے جس کی دیواریں گر چکی ہیں اور چھتوں پر بڑے سوراخ نظر آ رہے ہیں۔
ویڈیوز میں یونیورسٹی کی عمارت کو خالی دیکھا جا سکتا ہے اور ایسا لگتا ہے کہ کیمپس میں تدریس اور سیکھنے کا عمل جنگ کے آغاز سے ہی معطل ہے۔ کوئی جانی نقصان نہیں ہوا۔
ادھر اسرائیلی فوج کی گیواتی بریگیڈ نے حملوں میں ٹینک فائر اور فضائی مدد استعمال کرتے ہوئے حماس کے درجنوں جنگجوں کو ہلاک کرنے کا دعوی کیا ہے۔
دوسری جانب فلسطینی ہلال احمر نے تصدیق کی ہے کہ الامال اسپتال کے قریب توپیں اور میزائل داغے گئے۔ غزہ کی وزارت صحت نے ان حملوں میں 77 فلسطینیوں کی شہادت کی تصدیق کی ہے۔
امریکی محکمہ خارجہ کے ترجمان ڈیوڈ ملر نے ناکافی معلومات کی وجہ سے اس ویڈیو پر تبصرہ کرنے سے انکار کردیا تاہم کہا کہ انہوں نے اسرائیل سے ویڈیو کی وضاحت طلب کی ہے۔