میری درخواست ہے کہ تمام انتخابی نتائج درست کیے جائیں، علی امین گنڈا پور

پشاور: رہنما پاکستان تحریک انصاف علی امین گنڈا پور نے کہا ہے کہ میری درخواست ہے کہ الیکشن کے تمام نتائج درست کیے جائیں، عوام نے جس کو ووٹ دیا اس کی حکومت بنائیں۔
علی امین گنڈا پور نے عوام سے خطاب کرتے ہوئے کہا کہ پی ٹی آئی کے بانی جو کہتے ہیں وہی کرتے ہیں، بتانا چاہتا ہوں کہ ترقی کا سفر شروع ہوچکا ہے، ملک میں عوام جو چاہیں گے وہی حکومت بنے گی۔
عوامی حکومت ہی ملک میں تبدیلی لائے گی۔انہوں نے کہا کہ فارم 45 کے مطابق نتائج جاری کیے جائیں، بانی پی ٹی آئی کو رہا کرواکر ملک کو ترقی کی طرف لے جائیں گے، ایسا نظام بنائیں گے جس میں کوئی قانون ہاتھ میں نہ لے سکے۔ کمشنر راولپنڈی نے اعتراض کیا’ یہ اس بات کا ثبوت ہے کہ قوم جاگ چکی ہے۔
علی امین گنڈا پور نے کہا کہ صوبے کے عوام نے اپنے حق کی جنگ لڑی ہے، گزشتہ 2 سال میں جو کچھ ہوا، عوام نے ملک کے لیے برداشت کیا، صوبے میں امن و امان ہے، نوجوانوں کو روزگار دیا جائے، میں وعدہ کرو ملک ترقی کرے گا۔ یہ صوبہ ترقی کرے گا۔