مبینہ دھاندلی کے خلاف احتجاج، پی ٹی آئی رہنماؤں کے خلاف مقدمہ درج

عام انتخابات میں مبینہ دھاندلی کے خلاف احتجاج کرنے پر پاکستان تحریک انصاف (پی ٹی آئی) کے رہنما شعیب شاہین، شیر افضل مروت اور دیگر کے خلاف تھانہ کوہسار میں مقدمہ درج کر لیا گیا۔
حکومت کی جانب سے دائر کیے گئے مقدمے میں شعیب شاہین، شیر افضل مروت اور عامر مسعود مغل سمیت پی ٹی آئی کے دیگر رہنماؤں اور ریلی میں شریک 1500 نامعلوم افراد کو نامزد کیا یا ہے۔
مقدمہ تھانہ کوہسار میں مجموعی طور پر 6 دفعات کے تحت درج کیا گیا ہے، مقدمے میں دفعہ 144 کی خلاف ورزی اور ماتحتوں کے خلاف مزاحمت بھی شامل ہے۔
ایف آئی آر میں کہا گیا ہے کہ ریلی کے شرکا نے انتظامیہ کی جانب سے روکنے کے باوجود ریلی نکالی، پریس کلب پہنچ کر نعرے بازی کی، دونوں اطراف سے ٹریفک بلاک کر دی جس سے عوام کو پریشانی کا سامنا کرنا پڑا۔
واضح رہے کہ ملک بھر میں 8 فروری کو ہونے والے عام انتخابات میں مبینہ دھاندلی کے خلاف پی ٹی آئی رہنماؤں اور کارکنوں نے 17فروری(ہفتہ) کو اسلام آباد میں پریس کلب کے باہر احتجاج کیا۔ احتجاجی مظاہرے کی قیادت شیر افضل مروت نے کی تھی۔