مشہور رومانوی شاعر علی زریون کامیڈی فلم داغہ باز دل میں نظر آئیں گے

مشہور رومانوی شاعر علی زریون نے تصدیق کی ہے کہ وہ بھی رومانوی کامیڈی فلم داغہ باز دل میں نظر آئیں گے جس میں مہوش حیات، علی رحمان اور مومن ثاقب شامل ہیں۔
اداکارہ مہوش حیات کے ساتھ اپنی تصویر شیئر کرتے ہوئے علی زریون نے ایک طویل پوسٹ میں کہا کہ وہ عیدالفطر پر ریلیز ہونے والی فلم میں مرشد کے کردار میں نظر آئیں گے۔
انہوں نے کہا کہ فلم میں ان کا پہلا سین صوبہ سندھ کے دارالحکومت کراچی کے سخی حسن قبرستان میں آنجہانی مقبول شاعر جون ایلیا کی قبر پر فلمایا گیا تھا۔
علی زریون کے مطابق انہوں نے فلم کی شوٹنگ کے دوران پہلی بار جون ایلیا کی قبر پر حاضری دی اور اپنے فلمی کیریئر کا پہلا سین بھی شوٹ کیا۔
انہوں نے فلم ساز وجاہت رؤف اور ان کی اہلیہ شازیہ وجاہت کا بھی فلم میں کاسٹ کرنے پر شکریہ ادا کیا جب کہ فلم کی کاسٹ میں مہوش حیات، علی رحمان، مومن ثاقب، لیلی واسطی اور سلیم شیخ کے ساتھ کام کرنے پر بھی خوشی کا اظہار کیا۔