نہ یورپی یونین کو خط لکھا اور نہ ہی کوئی خط لکھنے کا ارادہ ‘ترجمان تحریک انصاف

اسلام آباد: پاکستان تحریک انصاف (پی ٹی آئی) نے وفاقی وزیر اطلاعات و نشریات عطا اللہ تارڑ کی جانب سے یورپی یونین کو خط لکھنے کے الزام کو مسترد کرتے ہوئے کہا ہے کہ جعلی وزیر اطلاعات کی پریس کانفرنس جھوٹ اور الزامات کا مجموعہ ہے اور کچھ نہیں ۔
ایک بیان میں پی ٹی آئی کے ترجمان نے کہا کہ جعلی وزیر اطلاعات عطا اللہ تارڑ کی پریس کانفرنس جھوٹ، بیان بازی، الزامات اور بے ہودگی کا مجموعہ ہے۔ عوام کا مینڈیٹ چرا کر زبردستی ملک پر قابض ہونے والے دوسروں کو حب الوطنی کا درس دے رہے ہیں۔
انہوں نے کہا کہ تحریک انصاف پاکستان کی سب سے بڑی اور مقبول جماعت ہے جو وفاق کی تمام اکائیوں کی نمائندگی کرتی ہے اور پی ٹی آئی نے یورپی یونین کو کوئی خط نہیں لکھا اور نہ ہی خط لکھنے کا کوئی ارادہ ہے۔
ترجمان پی ٹی آئی کا کہنا تھا کہ تحریک انصاف اور بانی چیئرمین عمران خان کی اپنے خلاف بدترین انتقامی کارروائیوں کے باوجود انٹرنیشنل مانیٹری فنڈ (آئی ایم ایف)پروگرام کی کامیابی کے لیے کوششیں سب کے سامنے ہیں۔
انہوں نے کہا کہ مسلم لیگ ن کے تجربہ کار وزیر خزانہ اسحاق ڈار کی نااہلی اور ہٹ دھرمی آئی ایم ایف پروگرام کی تکمیل میں تاخیر کا باعث بنی جس کی گواہی ان کے اپنے وزرا بھی دے چکے ہیں۔
پی ٹی آئی کے ترجمان کا کہنا تھا کہ عمران خان اور تحریک انصاف کی منظوری کے بعد آئی ایم ایف کی جانب سے قرض کی دوسری قسط جاری کر دی گئی، ملک کو دیوالیہ کی دہلیز پر پہنچانے والے مجرموں کے گروہ کو ایکبار پھر مسلط کر دیا گیا ۔
انہوں نے کہا کہ پاکستان ڈیموکریٹک موومنٹ (PDM) پارٹ ٹو کے تمام ‘تجربہ کار’ وزرا کا مقصد قومی فلاح نہیں بلکہ قومی خزانے سے اپنی تجوریاں بھرنا ہے۔ انہوں نے جھوٹ اور لغویات کا ایک نیا سلسلہ شروع کر رکھا ہے۔
ترجمان پی ٹی آئی کا کہنا تھا کہ حکومت کے لیے بہتر ہو گا کہ وہ جعلی فارم 47 کی بوگس سیاست کی روایت ترک کر کے اپنی مختصر حکومت کی توجہ ملک و قوم کی فلاح و بہبود پر مرکوز کرے۔