بھارت: نئی دہلی میں شدید بارشیں ‘ 11افراد ہلاک’60 پروازیں منسوخ

بھارت کے دارالحکومت نئی دہلی میں رواں ہفتے ہونے والی اچانک شدید بارشوں کے نتیجے میں مرنے والوں کی تعداد 11ہو گئی ہے جن میں سے چار شہری انڈر پاس میں ڈوب کر جان کی بازی ہار گئے۔خبر رساں ایجنسی رائٹرز کے مطابق رواں ماہ کے اوائل میں بدترین گرمی کا سامنا کرنے والے نئی دہلی میں 28جون سے شدید بارشوں کا سلسلہ شروع ہوا۔
بارش کی شدت کا اندازہ اس بات سے لگایا جا سکتا ہے کہ نئی دہلی میں ایک ہی دن میں ہونے والی بارش پورے مہینے میں شہر میں ہونے والی اوسط بارش سے زیادہ تھی۔موسلا دھار بارش کی وجہ سے دہلی کے مرکزی ہوائی اڈے کے تین ٹرمینلز میں سے ایک کی چھت گر گئی، فلائٹ آپریشن ٹھپ ہو کر رہ گئے، انڈر پاسز میں ڈوب گئے اور شہر کے کچھ حصوں میں بڑے پیمانے پر ٹریفک جام کے ساتھ ساتھ بجلی اور پانی کی بندش کی شکایات بھی عام رہیں۔
فلائٹ ٹریکنگ پلیٹ فارم فلائٹ آویئر کے اعداد و شمار کے مطابق گزشتہ 24گھنٹوں کے دوران نئی دہلی کے مرکزی ہوائی اڈے سے تقریبا 60پروازیں منسوخ کی گئیں۔
ہوائی اڈے کے ایک عہدیدار نے بتایا کہ اتوار کو فلائٹ آپریشنز معمول پر آ گئے اور جس ٹرمینل کی چھت گر گئی تھی، وہاں کی فلائٹ کو دیگر دو ٹرمینل کی جانب موڑ دیا گیا البتہ ان کا کہنا تھا کہ اس بات کا امکان موجود ہے مزید فلائٹس منسوخ ہو سکتی ہیں۔
دہلی ہوائی اڈہ ملک کے سب سے بڑے اور مصروف ترین ہوائی اڈوں میں سے ایک ہے۔اس وقت بند ٹرمینل 1 کو عموما نسبتا سستی پرازوں کے لیے استعمال کیا جاتا ہے اور فی الحال یہ ٹرمینل سالانہ 4 کروڑ مسافروں کو سنبھالنے کی صلاحیت رکھتا ہے۔