126ممالک کیلئے 24 گھنٹوں کے اندر آن لائن ویزا سسٹم کی منظوری

اسلام آباد: حکومت پاکستان نے 126 ممالک کے شہریوں کو آن لائن مفت ویزا فراہم کرنیکا فیصلہ کیا ہے۔وزیراعظم شہباز شریف کی زیر صدارت ہونے والے وفاقی کابینہ کے اجلاس میں اہم فیصلے کیے گئے۔
اعلامیے کے مطابق 126 ممالک کے لیے آن لائن ویزا درخواست سسٹم کے نفاذ کی منظوری دی گئی ہے۔ 126 ممالک کے شہری 24 گھنٹوں کے اندر کاروباری اور سیاحتی ویزا حاصل کرسکیں گے، ان 126 ممالک کے شہری ویزا پراسیسنگ فیس سے بھی مستثنی ہوں گے۔ تیسرے ملک کا پاسپورٹ رکھنے والے سکھ یاتریوں کے لیے آمد پر ویزا سہولت کی منظوری دی گئی ہے۔ ان سکھ یاتریوں کے لیے الگ سے سب کیٹیگری کی منظوری دی گئی ہے۔
کابینہ اجلاس سے خطاب کرتے ہوئے وزیراعظم کا کہنا تھا کہ حکومت کاروبار میں آسانیاں پیدا کرنے کے لیے پوری طرح کوشاں ہے، اس حوالے سے وزارت داخلہ اور متعلقہ وزارتوں اور حکام نے ایک بڑا قدم اٹھاتے ہوئے ویزا پالیسی میں بڑی تبدیلی کی ہے، اس پر سب مبارک باد کے مستحق ہیں۔
وزیراعظم نے بتایا کہ نئی پالیسی کے تحت 126 ممالک کے تاجروں اور سیاحوں سے ویزا فیس نہیں لی جائیگی، اس سے بیرونی سرمایہ کاری بڑھے گی، اس کی حتمی منظوری کابینہ دے گی۔
وزیراعظم کا کہنا تھا کہ ویزا پالیسی میں نرمی کے فیصلے سے پاکستان باہر سے آنے والوں کے لیے پرکشش مقام بنیگا، یہ ایک بڑا فیصلہ ہے اور وہ اس میں شامل سب افراد کو خراج تحسین پیش کرتے ہیں۔
وزیراعظم نے بتایا کہ پاکستان آنے کے خواہش مند افراد کو الیکٹرانک فارم کے ذریعے 24 گھنٹے میں ویزا مل جائیگا۔ ملک میں ہوائی اڈوں پر ای گیٹس کا قیام بھی عمل میں لایا جارہا ہے،گوادر سمیت 9 ہوائی اڈوں پر اس کا اجرا کیا جائے گا، پہلے مرحلے میں کراچی،لاہور اور اسلام آباد میں ای گیٹس کا اجرا کیا جائے گا۔
وزیراعظم کا مزیدکہنا تھا کہ ان اقدامات سے مذہبی سیاحت کو فروغ ملے گا، پاکستان میں بہترین مذہبی مقامات موجود ہیں، شمالی علاقوں میں بھی بہترین سیاحتی مقامات ہیں، وہاں بھی سیاحت کو فروغ ملے گا، معیشت مستحکم ہوگی اور زرمبادلہ کے ذخائر میں اضافہ ہوگا۔