پیمرا کی ٹی وی کامیڈی شوزمیں ریاستی اداروں کی وردی کا استعمال فوری طور پر بند کرنے کی ہدایت

پاکستان الیکٹرانک میڈیا ریگولیٹری اتھارٹی (پیمرا) نے تمام ٹی وی چینلز کو ہدایت کی ہے کہ وہ اپنے شوز میں پولیس کو طنزیہ انداز میں پیش نہ کریں۔
پیمرا کی ایک حالیہ ہدایت میں کہا گیا ہے کہ ٹی وی چینلز مزاحیہ اسکٹس اور طنزیہ پروگراموں کے دوران پولیس یونیفارم میں کرداروں کو توہین آمیز انداز میں پیش کر رہے ہیں۔
اس میں مزید بتایا گیا ہے کہ یہ بات انتہائی تشویش کے ساتھ دیکھی گئی ہے کہ سیٹلائٹ ٹی وی چینلز طنز پر مبنی پروگرام نشر کرنے اور پروڈیوس کرنے کے دوران ریاستی اداروں/قانون نافذ کرنے والے اداروں کی وردیوں کو ذلت آمیز طریقے سے استعمال کر رہے ہیں۔
پیمرا کے مطابق انہیں اس معاملے پر ناظرین کی جانب سے متعدد شکایات موصول ہوئی ہیں۔ریگولیٹر نے ٹی وی چینلز کو مشورہ دیا کہ وہ ایسے مکالموں کا کوئی کردار یا استعمال نہ دکھائیں جس سے ریاستی اداروں بالخصوص پولیس کے وقار کو نقصان پہنچے کیونکہ اس سے ناظرین میں اداروں کی ساکھ متاثر ہوتی ہے۔
ہدایت میں کہا گیا ہے کہ تمام سیٹلائٹ ٹی وی چینل کے لائسنس دہندگان کو ہدایت کی جاتی ہے کہ وہ اپنے کامیڈی شوز/ طنز میں ریاستی اداروں/ قانون نافذ کرنے والے اداروں کی وردی کا استعمال فوری طور پر بند کر دیں کیونکہ اس طرح کے مواد کو نشر کرنے سے یونیفارم کے وقار سے سمجھوتا ہو رہا ہے۔
ریگولیٹر نے مزید بتایا کہ ٹی وی چینلز پیمرا آرڈیننس 2002، پیمرا رولز، الیکٹرانک میڈیا(پروگرامز اور اشتہارات) کوڈ آف کنڈکٹ، 2015 کے ساتھ ساتھ اتھارٹی کی طرف سے جاری کردہ اپنے لائسنس کے ضوابط، شرائط و ضوابط کی تعمیل کرنے کے پابند ہیں۔ . خلاف ورزی کی صورت میں، اتھارٹی نے پیمرا آرڈیننس کے سیکشن 27، 29-اے اور 30 کے تحت کارروائی کا انتباہ دیا جو ریگولیٹر کو اختیار دیتا ہے کہ وہ چینلز کو کوئی بھی مواد نشر کرنے سے روکے اور خلاف ورزی کی صورت میں ان کا لائسنس منسوخ کرے۔