عالمی مجلس تحفظ ختم نبوت کے کارکنان رکاوٹیں عبور کرتے ہوئے ریڈزون میں داخل

اسلام آباد: مبارک ثانی کیس میں سپریم کورٹ کے فیصلے کے خلاف عالمی مجلس تحفظ ختم نبوت نے آبپارہ چوک سے ڈی چوک تک احتجاجی مارچ کیا۔
مختلف مذہبی جماعتوں کے سینکڑوں کارکنان ریلی کی صورت میں ایکسپریس چوک پہنچ گئے۔ اس موقع پر اسلام آباد پولیس کی بھاری نفری تعینات رہی جس نے ڈی چوک کی جانب جانے والیراستے بند کردیے۔
تحفظ ختم نبوت مارچ کے شرکا تاجدار ختم نبوت زندہ باد زندہ باد کے نعرے لگا رہے ہیں۔ مظاہرین نے مبارک ثانی کیس کے فیصلے میں چیف جسٹس کی سربراہی میں تین رکنی بینچ کے قادیانیوں کی تبلیغ سے متعلق نکتے کی مخالفت کی۔
انتظامیہ نے تحفظ ختم نبوت مارچ کے شرکا پر ریڈ زون میں داخل نہ ہونے کے لیے زور دیا تاہم مظاہرین رکاوٹیں عبور کرتے ہوئے ریڈزون میں داخل ہوگئے اور پارلیمنٹ ہاؤس کے سامنے پہنچ گئے۔ ریڈ زون پہنچنے پر پولیس کی جانب سے آنسو گیس کی شیلنگ بھی شروع کر دی گئی۔
مظاہرین ڈی چوک کا گیٹ زبردستی کھلوا کر ریڈ زون کی جانب روانہ ہوگئے اور مشتعل مظاہرین نے ڈی چوک سے رکاوٹیں بھی ہٹا دیں۔