اسرائیلی فوجیوں کی اشتعال انگیز کارروائی، قرآن پاک نذرآتش

اسلام آباد(مانیٹرنگ ڈیسک )قطری نشریاتی ادارے الجزیرہ نیوز کے مطابق اسرائیلی فوجیوں نے شمالی غزہ کی بنی صالح مسجد میں قرآن پاک کے نسخوں کی بیحرمتی کی اور اپنی مکروہ حرکت کی باڈی کیمرے سے ویڈیو بھی بنائی۔سوشل میڈیا پر سامنے آنے والی ویڈیوز میں اسرائیلی فوجیوں کو مسجد میں قرآن پاک کے نسخوں کی بے حرمتی کرتے ہوئے اور نذر آتش کرتے دیکھا جاسکتا ہے۔اسرائیل کی جانب سے غزہ میں قرآن پاک کی توہین پر دنیا بھر کے مسلمانوں میں شدید غم و غصہ پایا جارہا ہے۔اسرائیلی فوجیوں کی اشتعال انگیز کارروائی کی شدید مذمت کرتے ہوئے حماس کا کہنا ہے کہ اس طرح کا نفرت انگیز اقدام اسرائیلی فوج کی انتہاپسند فطرت کو ظاہر کرتا ہے، سوشل میڈیا پر ایسی ویڈیوز پوسٹ کرنا اسرائیل کی منظم مجرمانہ پالیسی کی نشاندہی کرتا ہے۔خیال رہے کہ اسرائیلی فوج 7 اکتوبر 2023 سے اب تک غزہ کی 609 مساجد کو شہید کر چکی ہے، اسرائیلی بمباری سے اب تک 211 مساجد کو جزوی نقصان بھی پہنچا ہے۔اسرائیلی جارحیت سے متاثر ہونے والی مساجد میں غزہ شہر کی 1400 سال پرانی عمری مسجد بھی شامل ہے۔اس کے علاوہ صیہونی فوج غزہ میں 3 گرجا گھروں کو بھی تباہ کرچکی ہے۔اسرائیلی جارحیت کے نتیجے میں7 اکتوبر 2023 سے اب تک 40 ہزار 300 سے زائد فلسطینی شہید ہوچکے ہیں جن میں اکثریت خواتین اور بچوں کی ہے۔ اس کے علاوہ 93 ہزار سے زائد افراد زخمی ہوئے ہیں۔