این اے 32 پشاور سے پی ٹی آئی رہنما شیر افضل مروت کے کاغذات منظور

پشاور: این اے 32 پشاور سے پی ٹی آئی کے سینئر نائب صدر اور رہنما شیر افضل مروت کے کاغذات منظور کر لیے گئے۔ اپیلٹ ٹربیونل پشاور ہائی کورٹ نے شیر افضل مروت کے کاغذات نامزدگی مسترد ہونے کے خلاف اپیل کی سماعت کی۔ ریٹرننگ آفیسر کے فیصلے کے خلاف پی ٹی امیدوار کی اپیل منظور کر لی گئی۔ دستاویزات کی منظوری کے بعد میڈیا سے گفتگو کرتے ہوئے شیر افضل مروت کا کہنا تھا کہ جس طرح پنجاب میں وکلا کو ٹکٹ ملے وہ خیبرپختونخوا میں نہیں ہوا۔ آج بانی پی ٹی آئی سے ملنے جا رہا ہوں اور انہیں کے پی کے ٹکٹوں کے حوالے سے آگاہ کروں گا۔ انہوں نے کہا کہ عاطف خان سے کوئی اختلاف نہیں، وہ آڈیو گروپ میں شیئر نہیں کرنی چاہیے تھی اور میں کسی سے معافی نہیں مانگ رہا تاہم عاطف خان کو فون کرکے ان سے معافی مانگ لی۔ شیر افضل مروت نے کہا کہ مجھے صوبائی تنظیم سے نہیں مرکزی تنظیم سے مسئلہ ہے، مرکزی تنظیم شاید میری زبان اور پذیرائی کی وجہ سے مجھے پسند نہ کرے۔ میں ارباب شیر علی کو پسند نہیں کرتا، وہ مسلسل میری مخالفت کر رہا ہے۔