ن لیگ مخالفین کو پچ سے آؤٹ رکھ کر اکیلے کھیلنا چاہتی ہے: بلاول

چیئرمین پیپلز پارٹی بلاول بھٹو زرداری نے کہا ہے کہ ن لیگ سیاست نہیں کرنا چاہتی بلکہ سیاسی مخالفین کو پچ سے آؤٹ رکھنا چاہتی ہے اور اکیلے کھیلنا چاہتی ہے۔
قمبر شہدادکوٹ میں صحافیوں سے گفتگو کرتے ہوئے بلاول بھٹو زرداری نے الزام لگایا کہ ن لیگ کے دباؤ میں آکر آر اوز نے چکوال، تلہ گنگ، ٹوبہ ٹیک سنگھ اور لاہور سے ہمارے بعض امیدواروں کو تیر کا نشان نہیں دیا،اس سے متعلق الیکشن کمیشن سے رجوع کر رہے ہیں ، عدالت بھی جائیں گے۔
بلاول بھٹو زرداری نے کہا کہ ن لیگ پنجاب میں پی ٹی آئی سے ہونے والے معاملے کا فائدہ اٹھانے کی کوشش کر رہی ہے، اب الیکشن نزدیک نظر آرہے ہیں، الیکشن میں مقابلہ اب شیر اور تیر میں ہے۔
اس سے قبل کارکنوں سے خطاب کرتے ہوئے بلاول کا کہنا تھا کہ مسلم لیگ ن کی سیاست جمہوری نہیں رہی، وہی پرانی سیاست ہے جس کا سب کو علم ہے، پیپلزپارٹی ن لیگ کی سازشوں کا ڈٹ کر مقابلہ کرے گی اور انہیں ناکام بنائے گی، جن کی غلط فہمی ہے کہ الیکشن نہیں ہوں گے ان کا نقصان ہوگا، جنہوں نے الیکشن سے بھاگنے کی کوشش کی انہیں نقصان ہوگا۔
ان کا کہنا تھا کہ ہم نہیں چاہتے کہ کسی سیاسی جماعت کو اس کے انتخابی نشان سے محروم کیاجائے، پی ٹی آئی نے انٹراپارٹی الیکشن درست طریقے سے نہیں کرایا، قاضی فائز عیسی جب سے چیف جسٹس پاکستان بنے قانون پرعمل درآمدکرکے فیصلے دیتے ہیں، پی ٹی آئی کا سپریم کورٹ پر سارا ملبہ ڈالنا نا انصافی ہے ، پی ٹی آئی کارکن عدلیہ کے بجائے اپنے اندر دیکھیں کہ خامیاں کہاں ہیں