شیر عوام کا خون چوس رہا ہے، چوتھی بار وزیراعظم نہیں بننے دیں گے، بلاول

چیئرمین پیپلز پارٹی بلاول بھٹو زرداری کا کہنا ہے کہ شیر عوام کا خون چوستا ہے، اسے چوتھی بار وزیراعظم نہیں بننے دیں گے اور اس کا راستہ روکیں گے۔بلاول بھٹو زرداری نے بدین میں جلسے سے خطاب کرتے ہوئے کہا کہ پیپلز پارٹی 8 فروری کو عوامی حکومت بنانے کے لیے ملک بھر میں جدوجہد کر رہی ہے، وہ چاہتے ہیں کہ ملک میں عوامی راج قائم ہو۔انہوں نے کہا کہ پیپلز پارٹی واحد جماعت ہے جو الیکشن لڑ رہی ہے اور مہم چلا رہی ہے۔ ایک آدمی چوتھی بار وزیراعظم بننے کی کوشش کر رہا ہے لیکن اس کے پاس کوئی منشور نہیں ہے۔ ہم عوام کی طاقت پر یقین رکھتے ہیں اور وہ سازشوں پر یقین رکھتے ہیں۔ نفرت اور تقسیم کی سیاست کرنے والے پاکستان کو نقصان پہنچا رہے ہیں، انہیں غریب عوام کی فکر نہیں، انہیں صرف چوتھی بار وزیراعظم بننے کی فکر ہے۔پیپلز پارٹی کے چیئرمین نے کہا کہ جب بھی اس شخص کو ان پر مسلط کیا گیا پاکستان کے عوام کو نقصان پہنچایا گیا۔ وہ شیر ہے جو عوام کا خون چوستا ہے۔ انہیں چوتھی بار وزیراعظم نہیں بننے دیں گے اور ان کا راستہ روکیں گے۔ان کا مزید کہنا تھا کہ پیپلز پارٹی کا 10 نکاتی ایجنڈا معاشی مسائل کا حل ہے، حکومت ملی تو غریب عوام کو 300 یونٹ تک مفت بجلی دوں گا، 20 لاکھ ریڈی میڈ گھر بنا رہے ہیں۔ متاثرین سیلاب، بے نظیر انکم سپورٹ میں اضافہ اور غریبوں کو بلاسود قرضے دیں گے، حکومت میں آئے تو کسانوں کو ہاری کارڈ دیں گے۔