ایران کے ساتھ کشیدگی؛ پاکستان نے پروازوں کی کڑی نگرانی شروع کر دی

کراچی: ایران کے ساتھ جاری کشیدہ صورتحال کے تناظر میں پاکستان نے پروازوں کی کڑی نگرانی شروع کردی۔
پاک ایران کشیدگی کے حوالے سے پاکستان نے ایران سمیت مغربی سمت سے آنے والی تمام پروازوں کی کڑی نگرانی شروع کردی۔ اس سلسلے میں مغربی سرحدوں پر فضا میں ہونے والی ہر سرگرمی پر کڑی نظر رکھی جا رہی ہے۔
حالیہ صورتحال کے پیش نظر مغربی سمت سے آنے والی تمام پروازوں کو الرٹ رہنے کی ہدایات جاری کر دی گئی ہیں۔ ذرائع کے مطابق سول ایوی ایشن اتھارٹی (سی اے اے)کو مغرب سے پاکستان کی حدود میں آنے والی تمام پروازوں کی کڑی نگرانی کی ہدایات موصول ہوئی ہیں۔
ایئر ٹریفک کنٹرول کو ایران سمیت تمام مغربی پروازوں کی تفصیلات جمع کرنے کی ہدایات موصول ہوئی ہیں۔ اس سے قبل مغرب سے پاکستان آنے والی پروازوں کی کبھی سخت نگرانی نہیں کی جاتی تھی۔ اس کے باوجود پاکستان اور ایران کی فضائی حدود تجارتی پروازوں کے لیے کھلی ہیں۔ ایئر ٹریفک کنٹرول(اے ٹی سی)کو ابھی تک ایران کے لیے فضائی حدود کی بندش کے حوالے سے کوئی ہدایات موصول نہیں ہوئی ہیں۔
ذرائع کا کہنا ہے کہ فی الحال ایران اور پاکستان کے درمیان کمرشل پروازیں بند کرنے کی کوئی ہدایت نہیں ہے۔