ایران میں پاکستان کے سفیر مدثر ٹیپو وطن واپس پہنچ گئے

اسلام آباد: ایران میں پاکستان کے سفیر مدثر ٹیپو وطن واپس پہنچ گئے۔ ذرائع کے مطابق ایران میں پاکستان کے سفیر مدثر ٹیپو دفتر خارجہ کی ہدایت پر وطن واپس پہنچ گئے ہیں۔ پاکستان نے گزشتہ روز سفیر کو واپس بلانے کا فیصلہ کیا تھا۔ واضح رہے کہ گزشتہ روز دفتر خارجہ کی ترجمان ممتاز زہرہ بلوچ نے اپنی مختصر پریس بریفنگ کے دوران بتایا تھا کہ انہوں نے ایران سے اپنے سفیر کو واپس بلا لیا ہے اور ایرانی سفیر بھی فی الحال پاکستان نہیں آرہے ہیں۔ ترجمان دفتر خارجہ کا کہنا تھا کہ پاکستانی حکام نے ایران کے تمام سفارتی دورے ملتوی کر دیے ہیں اور پاکستان نے ایرانی حکومت کو اپنے فیصلے سے آگاہ کر دیا ہے۔ ترجمان نے مزید کہا تھا کہ چابہار میں پاکستان ایران مشترکہ سرحدی تجارتی کمیٹی کا اجلاس بھی ملتوی کردیا گیا ہے۔