ملک بھر میں انٹرنیٹ و سوشل میڈیا ایپس سروسز متاثر

پاکستان بھر کے انٹرنیٹ و سوشل میڈیا صارفین نے 20 جنوری کی شام انٹرنیٹ کی رفتار انتہائی سست ہونے سمیت اس کے متاثر ہونے کی شکایات کیں۔زیادہ تر صارفین کے پاس شام ساڑھے 6 بجے کے بعد ابتدائی طور پر سوشل میڈیا ویب سائٹس اور ایپلی کیشن کی رفتار سست اور متاثر ہونا شروع ہوئی۔
کراچی، لاہور اور اسلام آباد سمیت مختلف شہروں کے انٹرنیٹ صارفین نے اپنا انٹرنیٹ بھی بار بار متاثر ہونے کی شکایت کی جب کہ سوشل میڈیا ایپلی کیشنز اور ویب سائٹس کی سروس ڈاون ہونے سے متعلق بھی شکایات کیں۔پاکستان بھر میں ایسے موقع پر انٹرنیٹ اور سوشل میڈیا ایپس کی سروس متاثر ہونے کی شکایات کی گئیں جب کہ پاکستان تحریک انصاف(پی ٹی آئی)کی جانب سے ورچوئل جلسے کا اعلان کیا گیا تھا۔
اس سے قبل گزشتہ ماہ دسمبر میں بھی پی ٹی آئی کے آن لائن جلسے کے موقع پر ملک بھر میں انٹرنیٹ سروسز متاثر ہوئی تھیں۔