حلقہ این اے 119: پی ٹی آئی کی امیدوار مریم نواز کے حق میں دستبردار

لاہور: لاہور کے قومی اسمبلی کے حلقہ این اے 119 کے لیے پی ٹی آئی کے امیدوار مسلم لیگ (ن) کی مریم نواز کے حق میں دستبردار ہوگئے۔
پی ٹی آئی کے ٹکٹ ہولڈر مہر محمد وسیم ہزاروں کارکنوں سمیت مسلم لیگ (ن) میں شامل ہوگئے، مہر محمد وسیم اور ان کے ساتھیوں نے حلقے میں مریم نواز شریف کی حمایت کا اعلان کردیا۔
مہر محمد وسیم نے اپنے ساتھیوں کے ہمراہ مسلم لیگ(ن) کی سینئر نائب صدر اور چیف آرگنائزر مریم نواز شریف سے ملاقات کی جس میں سینیٹر پرویز رشید، مریم اورنگزیب، علی پرویز ملک، خواجہ عمران نذیر اور دیگر رہنما بھی موجود تھے۔
پی پی اور این اے 119 کے چیئرمین، وائس چیئرمین، چیئرمین زکو کمیٹی، پارٹی عہدیداران اور سینکڑوں ساتھیوں نے مسلم لیگ(ن) میں شمولیت اختیار کر لی۔ مہر محمد وسیم اور ان کے ساتھی 25 جنوری کو ہونے والے جلسے میں مسلم لیگ (ن) میں شمولیت کا باضابطہ اعلان کریں گے جب کہ مریم نواز شریف بھی 25 جنوری کو جلسے میں شرکت کریں گی۔
مریم نواز شریف نے مہر محمد وسیم اور ان کے ساتھیوں کو مسلم لیگ(ن) میں شمولیت پر خوش آمدید کہا اور مبارکباد دی۔ انہوں نے اظہار خیال کرتے ہوئے کہا کہ آپ ترقی کے کارواں میں شامل ہو چکے ہیں، 2018 سے 2022 تک نااہلی کا اثر پورا پاکستان دیکھے اور محسوس کرے گا۔