الیکشن2018 میں دھاندلی کا شور مچانے والے پی ٹی آئی سے الیکشن لڑنا چاہتے ہیں’ فضل الرحمان

ڈیرہ اسماعیل خان: جمعیت علمائے اسلام ف کے سربراہ مولانا فضل الرحمان نے کہا ہے کہ 2018 کے عام انتخابات میں دھاندلی کے خلاف کھڑے ہونے والے آج اسی پارٹی کے ٹکٹ پر الیکشن لڑنا چاہتے ہیں۔
کبیر سٹیڈیم لکی مروت میں انتخابی جلسے سے خطاب کرتے ہوئے انہوں نے کہا کہ دوسری جماعتوں نے لوگوں کو مشکل میں ڈال دیا ہے اور ایک مخصوص طبقے کا پیٹ بھراجا رہا ہے۔ .
انہوں نے کہا کہ 2018 کے انتخابات میں دھاندلی ہوئی جس کے نتیجے میں حکومت آئی اور جو دھاندلی کے خلاف ہمارے ساتھ کھڑے تھے آج وہی لوگ اسی دھاندلی زدہ پارٹی کا ٹکٹ لے کر الیکشن لڑنا چاہتے ہیں’ ووٹ کی پرچی ایک آسان ترین جہادی فورم اور نظریاتی جنگ ہے مگر اس میں بھی ہم ادھر ادھر ہو جاتے ہیں۔
انہوں نے کہا کہ ہماری اسمبلیاں ایسے لوگوں سے بھری پڑی ہیں جو قرآن و حدیث سے متصادم بل پاس کرتے ہیں۔ اسمبلیوں میں بیٹھے لوگوں کو اسلامی قوانین سے کوئی دلچسپی نہیں۔
جے یو آئی(ف) کے سربراہ نے کہا کہ نہ صرف پاکستان بلکہ عالمی سطح پر ہم نے امریکہ اور یورپ جیسی بڑی طاقتوں کے سامنے حق کی آواز بلند کی۔ میں کہتا ہوں کہ امریکہ نے ہمارے ساتھ کچھ نہیں کیا۔ جب امریکہ نے افغانستان پر حملہ کیا تو جمعیت علمائے اسلام کے علاوہ کوئی جماعت سڑکوں پر نظر نہیں آئی۔
انہوں نے کہا کہ ہم چاہتے ہیں کہ افغانستان اور پاکستان اچھے پڑوسی کی طرح رہیں، اسرائیل ایک عفریت ہے جو فلسطین کی سرزمین پر زبردستی قبضہ کر لیتا ہے، اگر آپ کسی دہشت گرد ملک سے تعلق جوڑیں گے تو لوگ آپ کو بھی دہشت گرد کہیں گے۔
مولانا فضل الرحمان نے کہا کہ فلسطین میں عام لوگوں پر بمباری کی جا رہی ہے، ان میں زیادہ تر بچے اور خواتین ہیں، اس سب کے باوجود امریکہ اور مغربی طاقتیں ہمیں انسانی حقوق کا درس دیتی ہیں۔ کی قیادت سے ملاقات کی اور دنیا کو بتایا کہ ہم یہودیوں کے مقابلے میں مسلمانوں کے شانہ بشانہ کھڑے ہیں۔
انہوں نے کہا کہ کوئی بھی امریکہ کو ناراض نہیں کرنا چاہتا اور کوئی فلسطین کے حق میں نہیں بول رہا۔ جو لوگ ہمارے خلاف الیکشن لڑ رہے ہیں کیا ان میں اتنی ہمت ہے کہ وہ اپنے مسلمان بھائی کے شانہ بشانہ کھڑے ہوں؟ یہاں یہودیوں کی حمایت یافتہ سیاسی جماعتیں بنی ہیں، وہ یہودیوں کے ایجنٹ بن کر سیاست میں آئے ہیں، اس لیے ہم نے روز اول سے یہودیوں کے ایجنٹوں کا مقابلہ کیا ہے۔