وعدہ کرتی ہوں نواز شریف کو خدمت کا موقع دیا تو مہنگائی ختم ہو جائے گی، مریم نواز

ننکانہ صاحب: مسلم لیگ ن کی چیف آرگنائزر اور سینئر نائب صدر مریم نواز نے کہا ہے کہ وعدہ کرتی ہوں نواز شریف کو خدمت کا موقع دیا تو مہنگائی ختم ہو جائے گی۔
ننکانہ صاحب میں جلسے سے خطاب کرتے ہوئے مریم نواز نے کہا کہ میں پہلی بار آئی ہوں، میری مائیں بہنیں اس سردی میں بھی بیٹھی ہوئی ہیں، ننکانہ صاحب کے لوگ مشکل وقت سے ڈرنے والے نہیں۔
مریم نواز نے کہا کہ جب نواز شریف وعدہ کر رہے تھے تو میں خوش ہو رہی تھی، نواز شریف یہ ننکانہ صاحب سجائیں گے، ننکانہ نے فیصلہ دیا، ننکانہ میں شیر کی جیت ہوگی۔
سینئر نائب صدر مسلم لیگ(ن) نے کہا کہ مسلم لیگ ن کا مقابلہ کسی جماعت یا فرد سے نہیں، 120 روپے فی کلو چینی سے ہے، ہمارا مقابلہ بجلی کے بڑے بلوں سے ہے، کہا جاتا ہے کہ نواز شریف لاڈلے ہیں، ہاں۔ وہ ہے، لیکن وہ لوگوں کا لاڈلا ہے۔
مریم نواز نے کہا کہ نواز شریف کو بار بار نکالتے ہیں، نواز شریف کو بار بار نکالا گیا لیکن ننکانہ والوں نے انہیں ووٹ دے کر واپس لایا، ہمارا مقابلہ کسی شخص سے نہیں، ہمارا مقابلہ 20روپے کی روٹی سے ہے۔
انہوں نے کہا کہ اگر دھرتی کا کوئی سچا بیٹا ہے تو وہ نواز شریف ہے، آپ کے مسائل دنوں میں حل ہو جائیں گے، نواز شریف کو اتنے ووٹ دئیے کہ نواز شریف کو کسی کی بیساکھی کی ضرورت ہی نہیں رہے گی، مقابلے میں کوئی نظر نہیں آئے شیر پر ٹھپہ لگانا ہے۔