پی ٹی آئی کوہم نے ایسا بٹھایا کہ واپس نہیں آسکیں گے’مولانا فضل الرحمان

شکارپور: جمعیت علمائے اسلام کے سربراہ مولانا فضل الرحمان نے کہا ہے کہ پی ٹی آئی کے دور میں ترقیاتی منصوبے روکے گئے، پی ٹی آئی والے اب بھی کہتے ہیں دوبارہ آئیں گے، ہم نے آپ کو اس طرح بٹھایا کہ آپ واپس نہیں آئیں گے۔
جلسے سے خطاب کرتے ہوئے مولانا فضل الرحمان کا کہنا تھا کہ تحریک انصاف کے بانی ہمیں کہتے تھے کہ ہم نیا پاکستان بنا رہے ہیں، ہم اپنے نوجوانوں کو گمراہ نہیں دیکھنا چاہتے، ملک پر فتنہ مسلط ہوا تو اس کے خلاف لڑیں گے۔
انہوں نے کہا کہ فتنے کے دور میں شرح نمو صفر سے نیچے چلی گئی، افغانستان 40 سال سے حالت جنگ میں ہے، لیکن آج افغان کرنسی کی قدر پاکستانی روپے سے زیادہ ہے، پاکستان کو خوشحال معیشت کی ضرورت ہے۔
مولانا فضل الرحمان نے کہا کہ لوگ ہمیں طعنے دیتے ہیں کہ ہم اقتدار کی جنگ لڑ رہے ہیں، ہماری جنگ اسلام کو اقتدار میں لانے کی ہے، جے یو آئی اسلام کو اقتدار میں لانے کی جنگ کی وارث ہے۔
جے یو آئی کے سربراہ نے کہا کہ کیا ہمارے ہاں امن و امان ہے اور لوگوں کی جانیں محفوظ ہیں؟ روزانہ انسانی جانیں لی جاتی ہیں، معیشت ٹھیک نہیں، ہم دوسروں کو خیرات دیتے تھے، آج بھیک مانگ رہے ہیں۔
مولانا فضل الرحمان نے کہا کہ عالم اسلام پر کفر کا سایہ کیوں ہے؟ ہمیں اپنے کردار کا جائزہ لینا ہوگا۔