آٹھ فروری کو چوتھی بار وزیراعظم بننے کی سازش ناکام بنائیں’بلاول بھٹو

پیپلز پارٹی کے چیئرمین بلاول بھٹو نے کہا کہ 8فروری کو جو شخص چوتھی بار وزیراعظم بننا چاہتا ہے تیر پر ٹھپہ لگا کر اس کی سازش کو ناکام بنائیں۔
بلاول بھٹو نے راولپنڈی کے لیاقت باغ میں جلسے سے خطاب کرتے ہوئے کہا کہ (ن) لیگ آپ کو گمراہ کرنا چاہتی ہے اس لیے آپ سمجھداری سے ووٹ دیں اور چوتھی بار وزیراعظم بننے کے خواہشمندوں کی سازش کو ناکام بنائیں۔
چیئرمین پی پی نے کہا کہ ایک جماعت نے وہی پرانی سیاست شروع کر رکھی ہے اور وہ سمجھتے ہیں کہ وہ اس طرح چوتھی بار وزیراعظم بن جائیں گے، لیکن وہ نہیں جانتے کہ طاقت کا سرچشمہ عوام ہیں۔
انہوں نے کہا کہ ن لیگ کے نظریاتی کارکنوں کو سمجھائیں کہ اب وہ ن لیگ نہیں رہی لہذا شیر پر ٹھپہ لگانے کی بجائے تیر پر ٹھپہ مارو کیونکہ ہم تین نسلوں سے حکومت کر رہے ہیں۔
بلاول بھٹو نے کہا کہ ملک اس وقت خطرے میں ہے، معاشی اور جمہوری بحران ہے، جب کہ دہشت گرد پھر سر اٹھا رہے ہیں، لیکن صرف پیپلز پارٹی ہی ملک کو مشکلات سے نکال سکتی ہے، کوئی اچھا طالبان نہیں ہوگا اور کوئی برا طالبان نہیں ہوگا۔ جو ہمارے آئین کو نہیں مانیں گے تو پاکستان انہیں منہ توڑ جواب دے گا اور یہ صرف پیپلز پارٹی ہی کر سکتی ہے۔
چیئرمین پی پی نے کہا کہ تحریک انصاف کو نشان نہیں ملا کیونکہ ان کے وکلا بغیر تیاری کے سپریم کورٹ گئے، اس لیے اب مگرمچھ کے آنسو نہ بہائے جائیں۔ پی ٹی آئی کو پلانٹڈلوگوں کی وجہ سے نقصان ہوا۔