امیر جماعت اسلامی کاعمران خان، شاہ محمود کی سزا پراظہار افسوس

لاہور: امیر جماعت اسلامی سراج الحق نے کہا ہے کہ پی ٹی آئی کے بانی عمران خان اور سابق وزیر خارجہ شاہ محمود قریشی کو سائفر کیس میں سزا پر انتہائی افسوس ہے۔
اپنے بیان میں سراج الحق نے کہا کہ اس کیس کی کھلی عدالت میں سماعت ہونی چاہیے تھی تاکہ انصاف کے تقاضے پورے ہوتے، ہم سائفر کیس پر آزاد اور غیر جانبدار کمیشن کا مطالبہ کرتے ہیں۔
انہوں نے کہا کہ سائفر کیس کے حقائق پوری قوم کے سامنے لائے جائیں، ملکی معاملات میں امریکی مداخلت چھہتر سال سے جاری ہے، یہ پہلی بار ہے کہ ہمارے سرکاری حلقوں میں امریکی مداخلت کا چرچا ہے۔
امیر جماعت اسلامی کا کہنا تھا کہ پی ٹی آئی رہنماؤں کو فیصلے کے خلاف اپیل کا حق ہے، فیصلے آئین، قواعد و ضوابط کے مطابق ہونے چاہئیں، ملک میں آئین و قانون کی بالادستی کے لیے جدوجہد جاری رکھیں گے۔