بلوچستان کے دکھ درد کو سمجھتا ہوں ,بلاول بھٹو زرداری

چیئرمین پیپلز پارٹی بلاول بھٹو زرداری نے کہا ہے کہ بلوچستان کے عوام جانتے ہیں کہ لاپتہ افراد کا مسئلہ اگر کوئی حل کر سکتا ہے تو وہ میں ہوں۔
خضدار میں جلسہ عام سے خطاب کرتے ہوئے بلاول بھٹو زرداری کا کہنا تھا کہ عوام جانتے ہیں کہ میرے سوا کوئی وفاقی سیاستدان نہیں جو بلوچستان کے دکھ درد کو سمجھتا ہو۔ عوام جانتے ہیں کہ لاپتہ افراد کا مسئلہ اگر کوئی حل کر سکتا ہے تو وہ میں ہوں، ہاں عوام جانتے ہیں کہ پیپلز پارٹی واحد جماعت ہے جو جھکتی نہیں، ہم تمام قوتوں سے لڑنے کے لیے تیار ہیں لیکن عوامی حقوق پر سمجھوتہ نہیں کر سکتے۔
انہوں نے کہا کہ عوام جانتے ہیں کہ پی پی واحد جماعت ہے جو بلوچستان کو اس کا حق دلا سکتی ہے۔
انہوں نے کہا کہ ہماری جماعت ایک بار پھر دہشت گردوں کے نشانے پر ہے، وہ سمجھتے ہیں کہ یہ بچہ ہے ڈر کے مارے پیچھے ہٹ جائے گا۔ جتنے بھی حملے ہوئے، مستونگ، تربت، بولان اور خضدار میں حملے ہوئے، ان کا خیال تھا کہ لوگ خوفزدہ ہوں گے، لیکن ایسا نہیں ہوا، پی پی شہدا کی، غیرمندوںکی جماعت ہے، جو کسی بھی دہشت گرد کے سامنے سر نہیں جھکا سکتی۔
بلاول نے کہا کہ 8 فروری کو پورے بلوچستان میں تیروں کی بارش ہوگی، پارلیمنٹ میں پہنچا تو عوام جانتے ہیں کہ ان کی آواز بن کر اٹھوں گا۔ وزیر خارجہ بنا تو پوری دنیا میں بلوچستان کی نمائندگی کروں گا۔
انہوں نے کہا کہ جس طرح سندھ میں تین لاکھ گھر بنا کر مستحق لوگوں کو دے رہا ہوں، اسی طرح بلوچستان میں تیس لاکھ گھر بنا کر لوگوں کو مالکانہ حقوق دوں گا۔