سازش کرنے والے تاریخ کے کوڑے دان میں ہیں، مریم نواز

مسلم لیگ (ن)کی چیف آرگنائزر مریم نواز نے کہا ہے کہ سازش کرنے والے تاریخ کے کوڑے دان میں ہیں۔
مینگورہ میں جلسے سے خطاب کرتے ہوئے انہوں نے کہا کہ نواز شریف کو اپنی اہلیہ کے انتقال کی خبر جیل میں ملی، لیکن جب نواز شریف عوام کا دکھ دیکھتے ہیں تو اپنا غم بھول جاتے ہیں۔
انہوں نے کہا کہ نواز شریف کو نااہل کرنے والے آج چھپ چھپ کر دیکھ رہے ہوں گے، بہت سے لوگوں نے آ کر سازشیں کیں اور کہا کہ نواز شریف کی سیاست ختم ہو گئی، نواز شریف وطن واپس آئے تو پورا پاکستان مینار پاکستان پر جمع ہو گیا۔
آج نواز شریف جہاں بھی جاتے ہیں لوگوں کا ہجوم آتا ہے۔توشہ خانہ کیس میں سابق وزیراعظم عمران خان کی سزا کے حوالے سے مریم نواز نے کہا کہ نواز شریف کو چور کہنے والے نے خود کو بڑا چور ثابت کر دیا ہے۔
انہوں نے کہا کہ اگر ان کے بچے لندن میں محفوظ ہیں تو کارکنوں کے بچے جیلوں میں کیوں ہیں؟ کارکن جیل میں ہیں تو بنی گالہ میں خاتون کیوں؟ مجھے ریسٹ ہاس منتقل کرنے کی پیشکش بھی کی گئی جسے میں نے ٹھکرا دیا، میں نے جیل میں سہولتیں نہیں مانگیں، عام قیدی کی طرح زندگی گزاری۔
رہنما مسلم لیگ (ن) کا مزید کہنا تھا کہ میں اور نواز شریف کسی کے دکھ پر خوش نہیں ہوتے، کسی کو جیل جاتا دیکھ کر خوشی نہیں ہوتی۔مریم نواز نے کہا کہ نوجوانوں سے پوچھتی ہوں کہ انہیں پیٹرول بم چاہیے یا لیپ ٹاپ؟