دہشت گرد حملے میں شہید ہونے والے عالمی مشن میں شامل پاکستانی سپاہی سپرد خاک

راولپنڈی: دہشت گردوں کے حملے میں شہید ہونے والے بین الاقوامی مشن میں شامل پاکستانی فوجی کو سپرد خاک کر دیا گیا۔
ترجمان پاک فوج (آئی ایس پی آر)کے مطابق 29 جنوری 2024 کو اقوام متحدہ کے امن مشن کے دوران جنوبی سوڈان کے درمیان متنازع علاقے میں دہشت گردوں کے حملے میں شہید ہونے والے سپاہی محمد طارق شہید (مقامی بدین، سندھ) نے جام شہادت نوش کیا۔ جنہیں پورے فوجی اعزاز کے ساتھ ان کے آبائی علاقے میں سپرد خاک کیا گیا۔
شہید سپاہی کی نماز جنازہ میں پاک فوج کے اعلی افسران اور جوانوں، شہید کے لواحقین اور اہل علاقہ کی بڑی تعداد نے شرکت کی۔
آئی ایس پی آر کے مطابق پاکستان کی امن فوج نے ہمیشہ اپنی پیشہ ورانہ مہارت اور فرض سے لگن کی وجہ سے خود کو ممتاز کیا ہے۔ دنیا بھر میں امن کے لیے اب تک 181 پاکستانی اپنی قیمتی جانوں کا نذرانہ پیش کر چکے ہیں۔ پاکستان کی سیکیورٹی فورسز اندرون و بیرون ملک ہر محاذ پر پاکستان کی سربلندی کے لیے ہر لمحہ تیار ہیں