کشمیر کی آزادی کے لیے خون کے آخری قطرے تک لڑیں گے، سراج الحق

لاہور: امیر جماعت اسلامی پاکستان سراج الحق نے کہا ہے کہ قوم نے فیصلہ کرنا ہے کہ شیر کی صحیح جگہ پنجرہ ہے۔
مال روڈ لاہور پر یوم یکجہتی کشمیر ریلی سے خطاب کرتے ہوئے سراج الحق نے کہا کہ عالم اسلام کی بدقسمتی ہے کہ دو ارب مسلمان ہزاروں ٹینکوں اور جہازوں کی موجودگی کے باوجود گزشتہ 76 سالوں سے کشمیری بھائی غلامی کی زنجیروں میں جکڑے ہوئے ہیں۔ ہم اللہ سے وعدہ کرتے ہیں کہ کشمیر اور فلسطین کی آزادی کے لیے خون کے آخری قطرے تک لڑیں گے۔
انہوں نے کہا کہ پیپلز پارٹی اور مسلم لیگ کو ووٹ دینا کشمیریوں اور فلسطینیوں کے زخموں پر نمک چھڑک رہا ہے، انہوں نے حکومت میں رہتے ہوئے کشمیر اور فلسطین کی آزادی کے لیے کیا کیا، تیر اور شیرکو ووٹ دینے کا مطلب کرپشن کو ووٹ دینا ہے۔
سراج الحق نے کہا کہ ہم قرآن و سنت کا نظام نافذ کریں گے اور سود ی نظام کا خاتمہ کریں گے، آئی ایم ایف کو خیرباد کہہ دیں گے، ہر بچے کو تعلیم دیں گے اور ہر نوجوان کو روزگار دیں گے۔
ان کا مزید کہنا تھا کہ نواز شریف اور زرداری کے پاس ناجائز دولت نہ ہوتی تو وہ کونسلر نہ بنتے۔ انہوں نے کراچی اور اندرون سندھ کو تباہ کیا ہے۔