اسماعیل ہنیہ کے بیٹے حازم ہنیہ اسرائیلی فوج کے فضائی حملے میں شہید

غزہ: غزہ میں حماس کے سیاسی بیورو کے سربراہ اسماعیل ہنیہ کے بیٹے حازم ہنیہ اسرائیلی فوج کے فضائی حملے میں شہید ہوگئے۔
ٹائمز آف انڈیا کے مطابق اسرائیلی حکومت سے تعلق رکھنے والے ممتاز سوشل میڈیا اکانٹس نے اطلاع دی ہے کہ حماس کے رہنما اسماعیل ہنیہ کے بیٹے حازم اسماعیل ہنیہ کو شہید کر دیا گیا ہے۔
سوشل میڈیا کے ان دعوؤں کی بنیاد پر مقامی فلسطینی میڈیا نے کہا ہے کہ اسرائیلی جنگی طیاروں نے غزہ میں ایک مکان کو نشانہ بنایا جس سے عمارت مکمل طور پر تباہ ہو گئی۔
مقامی میڈیا کے مطابق حماس کے رہنما اسماعیل ہنیہ کے خاندان کے کچھ افراد اس عمارت میں رہ رہے تھے۔ حملے میں اسماعیل ہانیہ کے بیٹے حازم ہانیہ کے شہید ہونے کی غیر مصدقہ اطلاع ہے۔
حماس کی طرف سے ان خبروں کی تردید یا تصدیق نہیں کی گئی ہے اور نہ ہی اسماعیل ہنیہ، جو اس وقت نامعلوم مقام پر مقیم ہیں، کا کوئی بیان منظر عام پر آیا ہے۔
فلسطینی میڈیا کے مطابق حازم ہنیہ کی عمر صرف 22 سال تھی اور وہ کالج کا طالب علم تھا۔ 7 اکتوبر سے شروع ہونے والی غزہ جنگ میں حماس کے رہنما اسماعیل ہنیہ کے خاندان کے 14 افراد شہید ہو چکے ہیں۔