مجلس شوری نے سراج الحق کا استعفی مسترد کر دیا

جماعت اسلامی کی مجلس شوری نے سراج الحق کا استعفی منظور نہیں کیا جس کے بعد سراج الحق نے دوبارہ جماعت اسلامی پاکستان کی قیادت سنبھال لی۔
جماعت اسلامی کی مرکزی مجلس شوری کا ہنگامی اجلاس منصورہ میں جماعت اسلامی کے نائب امیر لیاقت بلوچ کی زیر صدارت منعقد ہوا۔
اجلاس میں شوری کے ارکان نے کہا کہ وہ پہلے کی طرح جماعت کی ذمہ داریاں بطور امیر ادا کریں۔کمیٹی کے ممبران لیاقت بلوچ، امیر العظیم، راشد نسیم، پروفیسر ابراہیم، اسد اللہ بھٹو نے سراج الحق سے ملاقات کی۔
ترجمان قیصر شریف نے کہا کہ مرکزی مجلس شوری نے متفقہ طور پر امیر جماعت اسلامی سراج الحق کا استعفی مسترد کر دیا۔انہوں نے کہا کہ مجلس شوری نے جماعت اسلامی کے رہنما سراج الحق پر مکمل اعتماد کا اظہار کیا ہے۔قیصر شریف نے کہا کہ سراج الحق مرکزی مجلس شوری سے خصوصی خطاب کریں گے، امیر جماعت آئین کے مطابق اپنی ذمہ داریاں جاری رکھیں گے۔
یاد رہے کہ جماعت اسلامی کے ترجمان نے کہا تھا کہ 11 فروری کو جماعت اسلامی کے نئے امیر کا انتخاب 31 مارچ کو کرنے کا فیصلہ کیا گیا ہے، جس میں سراج الحق، لیاقت بلوچ، حافظ نعیم الرحمان شامل ہیں۔
سراج الحق نے ٹویٹ کیا تھا کہ محنت اور کوشش کے باوجود کامیابی نہ دلا سکے، الیکشن میں شکست کی ذمہ داری قبول کرتے ہوئے جماعت اسلامی کی قیادت سے استعفی دیتا ہوں، الیکشن میں شکست کی ذمہ داری قبول کرتا ہوں۔